काठमाडौं । जर्मनी सरकारले अल्टरनेटिभ फर ड्युचल्यान्ड (एएफडी)लाई उग्र–दक्षिणपन्थी शक्तिको रूपमा सूचीकृत गर्ने निर्णयविरुद्ध अमेरिकाले कडा आलोचना गरेको छ ।

तर, अमेरिकी विदेशमन्त्री मार्को रुबियो र उपराष्ट्रपति जेडी भान्सले जर्मनी सरकारले सो निर्णयको विराेध गरेको बीबीसीले जनाएको छ ।

अमेरिकी उपराष्ट्रपति जेडीले बर्लिन पर्खाल पुनर्निर्माण गर्न खोजेको आरोप लगाए भने विदेशमन्त्री मार्को रुबियोले यो वर्गीकरणलाई छद्म निरंकुशताको उपनाम दिएका छन् ।

जर्मनी विदेशमन्त्रीको कार्यालयले एक्समा विदेशमन्त्री रुबियोलाई जवाफ दिँदै भनेको छ, “दक्षिणपन्थी उग्रपन्थीलाई रोक्नुपर्छ भन्ने हामीले इतिहासबाट सिकेका छौँ ।”  

जर्मनीको गुप्तचर एजेन्सी बीएफभीले एएफडीलाई सूचीकृत गरेको हो । एएफडीको जाति र वंशमा आधारित मानव अवधारणा जर्मनीको स्वतन्त्र लोकतान्त्रिक व्यवस्थाविरुद्ध रहेको निष्कर्ष निकालेको छ । 

गत फेब्रुअरीमा भएको संघीय निर्वाचनमा एएफडी पार्टीले २०.८ प्रतिशत मत ल्याएर ६३० सिटको सदनमा १५२ सिट जित्दै दोस्रो स्थान प्राप्त गरेको थियो ।

गुप्तचर एजेन्सीले यसअघि नै एएफडीलाई तीन पूर्वी राज्यहरूमा उग्र दक्षिणपन्थी घोषणा गरेको थियो । सरकारको यो वर्गीकरण अब पूरै पार्टीमा लागु गरिएको बताइएको छ । 

गुप्तचर एजेन्सीले एएफडीले केही जनसमुदायलाई समाजमा समान सहभागिताबाट बञ्चित गर्ने लक्ष्य राखेको  बताएको छ । विशेषगरी यसले मुस्लिम बहुल देशबाट आएर नागरिक बनेका व्यक्तिलाई जर्मन नागरिक मान्दैन ।

एएफडीका सह–अध्यक्ष एलिस वेइडेल र टिनो क्रुपालाले यो निर्णय स्पष्ट राजनीतिक कारणले गरिएको र जर्मन लोकतन्त्रप्रतिको घातक प्रहार भएको बताए । पार्टीका संसदीय दलका उपनेता बिएट्रिक्स फन स्टोर्चले बीबीसीलाई भनिन्, “यो निरंकुश राज्यले आफ्ना पार्टीहरूसँग गर्ने व्यवहार हो ।”