काठमाडौं । नेपाली कांग्रेसका सांसद डा. शेखर कोइरालाले श्रमिक आयोग बनाउनुपर्नेमा जोड दिएका छन् । १३६औँ अन्तर्राष्ट्रिय श्रमिक दिवसका अवसरमा बिहीबार (वैशाख १८) ललितपुरमा नेपाल ट्रेड युनियन कांग्रेसले आयोजना गरेको कार्यक्रममा उनले यस्तो बताएका हुन् ।

श्रमिककै अथक प्रयासका कारण विभिन्न समयका आन्दोलन सफल भएको उनले उल्लेख गरे । श्रमिकका समस्या समाधान गर्न श्रम आयोग गठन गर्नुपर्ने विषयमा कांग्रेस गम्भीर रहेको उनले बताए ।

“...साथीहरू होटेलमा कार्यरत श्रमिकहरूले जुन १० प्रतिशतको कुरा गर्नुभएको छ, उहाँहरूले धेरै ठूलो कुरा, माग गर्नुभएको छैन,” उनले भने, “कानुन बनाएर यसलाई अगाडि बढाऔँ भनेर सुप्रिम कोर्टले पनि भनेको छ । त्यसलाई नेपाली कांग्रेसले कानुन बनाउन अघि बढ्छ ।”

ठूलो अर्थतन्त्र भएका दुई मुलुकबीच हाल व्यापार युद्ध चल्दा विश्वको परिस्थिति नाजुक भएकाले त्यसको असर नेपालमा पनि पर्ने उनले सुनाए ।

सांसद कोइरालाले श्रमिकले नलडेको भए २००७ सालको क्रान्ति र ०४६ र ०६२३/०६३ को आन्दोलन सफल नहुने टिप्पणी गरे । न्युज एजेन्सी नेपाल