काठमाडौं । नवलपरासीको पाल्हीनन्दन गाउँपालिका–५, स्थित राजनारायण माध्यमिक विद्यालयका तत्कालीन प्रधानाध्यापक रेशमराज कँडेल र सञ्चालक समितिका सदस्य सुरेन्द्र कहार भ्रष्टाचार मुद्दामा दोषी ठहर भएका छन् ।

अख्तियार दुरुपयोग अनुसन्धान आयोगका अनुसार, विद्यालय बनिसकेपछि ठेकेदारलाई भुक्तानी दिने क्रममा घुस मागेपछि उनीहरूलाई घुस रकमसहित पक्राउ गरिएको थियो । ०८१ माघ २० गते अख्तियारले उनीहरूसहित सहायक लेखापाल सुरेश गुप्ताविरुद्ध मुद्दा दायर गरेको थियो ।

मंगलबार विशेष अदालतका सदस्यहरू न्यायाधीश तेजनारायण सिंह राई, मुरारीबाबु श्रेष्ठ र विदुर कोइरालाको इजलासले कँडेल र कहारलाई दोषी ठहर गरेको हो । गुप्ताले भने सफाइ पाएका छन् ।

गुप्ताको टेबुल छेउमा घुसबापतको ५० हजार रुपैयाँ भेटिएको थियो । तर, उनको सहमतिमा रकम राखेको प्रमाणित हुन नसकेपछि अदालतले गुप्तालाई सफाइ दिएको हो ।

विद्यालयको भवन निर्माणपछि अन्तिम बिल भुक्तानी गर्ने क्रममा सेवाग्राहीबाट ६५ हजार रुपैयाँ घुस लिएको अवस्थामा उनीहरूलाई रंगेहात फेला पारिएको अख्तियारले जनाएको छ ।

अख्तियारका अनुसार, कहारको खल्तीमा १५ हजार रुपैयाँ र सहायक लेखापालको टेबुलनजिकबाट ५० हजार रुपैयाँ बरामद गरिएको थियो ।