काठमाडौं । प्रधानमन्त्री केपी शर्मा ओलीले द्वन्द्वकालमा भएका अमानवीय र जघन्य अपराधलाई माफी दिन नसकिने स्पष्ट पारेका छन् । नेपाल भूतपूर्व सैनिक तथा प्रहरी संगठनको छैटौँ राष्ट्रिय महाधिवेशनलाई उद्घाटन गर्दै ओलीले संक्रमणकालीन न्याय टुंगोमा पुर्‍याउँदा आयोगबाट पीडितलाई न्याय दिने गरी कार्यसम्पादन हुने बताए ।

संक्रमणकालीन न्यायसम्बन्धी आयोग गठन प्रक्रियामा अब ढिलाइ नहुने उनको भनाइ छ । उनले देशमा अनावश्यक हिंसा प्रारम्भ भएको र त्यसका कारण मुलुक अकारण अशान्तिको भूमिमा परिणत भएको बताए ।

प्रधानमन्त्री ओलीले अधिनायकवाद परास्त भएर लोकतान्त्रिक प्रणालीमा मुलुक गइसकेकाले अब कुनै बहकावमा लागेर हत्या, हिंसा, धार्मिक भड्काव र अराजकता स्वीकार्य नहुने उल्लेख गरे । प्रधानमन्त्री ओलीले विविधतायुक्त मुलुकमा सामाजिक सद्भावसहितको राष्ट्रिय एकता आवश्यकतामा जोड दिए ।

ओलीले यही वैशाख ११ गते लोकतन्त्र दिवसका दिन एमालेले युवाहरूको सम्मेलन गरी जनताको अधिकार र विकासका पक्षमा उत्सव मनाउन आह्वान पनि गरे ।