काठमाडौं । गत असोज महिनामा अविरल वर्षाका कारण सिर्जित मनसुनजन्य विपद्‍बाट क्षतिग्रस्त निजी आवासको विस्तृत क्षति आकलन सुरु गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले क्षतिग्रस्त जिल्लामध्ये काभ्रेको रोशी गाउँपालिका वडा नं २ नारायणटारबाट आकलन सुरु गरेको हो ।

रोशी गाउँपालिका वडा नम्बर २ का ३ जनालाई क्षति आकलन निस्सा उपलब्ध गराउँदै गृहमन्त्री रमेश लेखकले विस्तृत क्षति आकलन सुरुवात गरे । उनले ज्यादा प्रभावित जिल्ला र स्थानीय तह भएकाले रोशीबाट आकलन सुरुवात गरिएको जानकारी दिए । 

क्षति आकलनपछि पुनर्निर्माण सहज हुने भन्दै उनले छिटो आकलन सकाएर पुनर्निर्माण थाल्न प्रभावित र स्थानीय तहलाई आग्रह गरे । गृहमन्त्री लेखकले सरकारले गत असोज महिनामा बाढीपहिरोबाट क्षति भएका निजी आवास पुननिर्माणको काम एक वर्षभित्र सक्ने लक्ष्य राखेको उल्लेख गरे । 

सो क्रममा प्रतिनिधिसभा क्षेत्र नम्बर १ का सदस्य सूर्यमान दोङले पुल, तटबन्धनलगायत पूर्वाधार निर्माण गरेर मात्रै पुनर्निर्माण पूर्ण हुने बताए । नेपाली कांग्रेस काभ्रेका सभापति तीर्थ लामाले नारायणटारलगायत काभ्रेका विभिन्न खेतीयोग्य फाँट बगरमा परिणत भएको भन्दै दुई वर्षभित्र पुरानै अवस्थामा फर्काउन योजना र कार्यक्रम ल्याउनुपर्नेमा जोड दिए । 

विस्तृत क्षति आंकलनका लागि रोशी गाउँपालिकाबाट तीनवटा क्लस्टरमा र संयुक्त राष्ट्रसंघीय विकास कार्यक्रम (यूएनडीपी)को सहयोगमा राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट समेत गरी २२ जना प्राविधिक खटिने बताइएको छ ।