काठमाडौं । प्रियान्स आर्याको शतकप्रेरित पञ्जाब किंग्सले इन्डियन प्रिमियर लिग (आईपीएल)मा चेन्नाई सुपर किंग्सविरुद्ध १८ रनको जित निकालेको छ ।

मंगलबार राति मुल्लानपुरस्थित महाराज यादविन्दर सिंह अन्तर्राष्ट्रिय क्रिकेट मैदानमा टस जितेर ब्याटिङ रोजेको घरेलु टोली पञ्जाबले निर्धारित २० ओभरमा ६ विकेट गुमाउँदै २१९ रन बनाएको थियो । २२० रनको लक्ष्यसहित मैदान उत्रिएको चेन्नाईले २० ओभरमा पाँच विकेट गुमाएर २०१ रनमात्र बनाउन सक्यो ।
 
चेन्नाईका डिभोन कोन्वेले सर्वाधिक ६९ रन बनाए पनि टिमको हार टार्न सकेनन् । रचिन रवीन्द्रले ३६, शिवन दुबेले ४२ तथा पूर्वकप्तान महेन्द्रसिंह धोनीले २७ रन जोडे ।

पञ्जावका लकी फर्गुसनले दुई विकेट हात पारे । यश ठाकुर र ग्लेन म्याक्सवेलले समान एक विकेट लिए ।

यसअघि पञ्जाबका प्रियान्सले ४२ बलमा ९ छक्का र सात चौकासहित सर्वाधिक १०३ रन बनाएका थिए । शशांक सिंहले ३६ बलमा तीन छक्का र दुई चौकासहित अविजित ५२ र मार्को यानसनले अविजित ३४ रन बनाए ।

चेन्नाईका खलिल अहमद र रविचन्द्रन आश्विनले समान दुई विकेट लिए । मुकेश चौधरी र नुर अहमदले समान एक विकेट लिए ।

जितसँगै पञ्जाव चार खेलमा ६ अंकसहित चौथो स्थानमा रहेको छ । चेन्नाई भने पाँचमध्ये एक मात्रै जित निकाल्दा नवौँ स्थानमा छ ।