काठमाडौं । शुक्रबार राति जाजरकोटको कुसे गाउँपालिकालाई केन्द्रविन्दु बनाएर गएका दुईवटा भूकम्पका कारण आठ व्यक्ति घाइते भएका छन् । रुकुम (पश्चिम)मा २ जना र जाजरकोटमा ६ जना गरी कूल आठ जना घाइते भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता रामबहादुर केसीले जानकारी दिए । 

प्रवक्ता केसीका अनुसार जाजरकोटका तीनजना उपचारपश्चात् डिस्चार्ज भएका छन्। त्यस्तै, जाजरकोटका ३ जना तथा रुकुम (पश्चिम)का २ जना गरी ५ जनाको हाल स्थानीय तथा जिल्ला अस्पतालमा उपचार चलिरहेको छ। 

उपचारत ५ जनामध्ये ४ जनाको अवस्था सामान्य र १ जनाको अवस्था मध्यम रहेको छ। प्राधिकरणले भूकम्पमा परी घाइते भएका सबैको शीघ्र स्वास्थ्यलाभको कामना गरेको छ।

शुक्रबार राति ८ः०७ बजे र लगत्तै ८ः१० बजे क्रमशः ५.२ म्याग्निच्युड र ५.५ म्याग्निच्युडका दुई भूकम्प गएका थिए। ती भूकम्पका धक्का जाजरकोट, रुकुम (पश्चिम), कालीकोटलगायत जिल्लामा महसुस गरिएको विवरण प्राप्त भएको प्राधिकरणले जनाएको छ । ती जिल्लाका केही निजी आवास तथा सरकारी भवनमा सामान्य चिरा परेको एवं भवन चर्किएको छ । 

अधिकांश व्यक्ति भूकम्प आएको बेला आत्तिएर घरको छत वा अग्लो भागबाट हाम फाल्दा, असावधानीपूर्वक अत्तालिएर भाग्न खोज्दा घाइते भएको प्राधिकरणले जनाएको छ । भूकम्पमा आत्तिईर सुरक्षित तरिकाले सावधानीपूर्वक बस्न र भूकम्प गएको बेला वरपरको स्थिति समेत विचार गर्दै सावधानीपूर्वक सुरक्षित स्थानमा जान प्रधिकरणले आग्रह गरेको छ ।
 
प्राधिकरणका प्रवक्ता केसीले भवन संरचना निर्माण गर्दा भूकम्प प्रतिरोधी हुने गरी बनाउन एवं भूकम्पीय सुरक्षाको दृष्टिकोणबाट पालना गर्नुपर्ने नियमको अनुशासनपूर्वक पालना गर्न सबैमा अनुरोध पनि गरेका छन् । 

जाजरकोट र रुकुम (पश्चिम)मा गत वर्षको जाजरकोट भूकम्पबाट क्षतिग्रस्त निजी आवास तथा सार्वजनिक संरचनाको पुनर्निर्माणको प्रक्रियाअन्तर्गत विस्तृत क्षति आकलन र अनुदान सम्झौता भइरहेको छ ।