काठमाडौं । पूर्व मुख्यसचिव तथा पूर्व राजदूत दामोदरप्रसाद गौतमको मंगलबार बिहान निधन भएको छ ।  

८७ वर्षीय गौतमको उपचारकै क्रममा निधन भएको जानकारी परिवारले दिए । गौतम १९९४ सालमा बाराको कलैयामा जन्मेका हुन् ।

गौतम २०४७ माघ २० गतेदेखि २०४९ कात्तिक २० गतेसम्म मुख्यसचिव थिए । सरकारले तीस वर्षे निजामती सेवा लागू गरेपछि गौतम अवकाशमा गए । २०५५ साल असोजमा उनलाई गिरिजाप्रसाद कोइराला सरकारले अमेरिकाका लागि राजदूत नियुक्त गरेको थियो ।

चार वर्षका लागि राजदूत नियुक्त भए पनि अढाइ वर्ष बिताउन नपाउँदै सरकारले फिर्ता बोलाएको थियो । 

गौतमले परराष्ट्र मन्त्रालयँग फिर्ता हुनुको ‘लिखित कारण’ मागेका थिए । ‘आफूले जसरी अरुले बीचैमा फिर्ता हुनु नपरोस्’ भन्ने उद्देश्यसहित कारण मागेका थए । तर, सरकारले जवाफ दिएन । 

गौतम २०१८ सालमा शाखा अधिकृत हुँदै सरकारी सेवामा प्रवेश गरेका थिए ।  

लामो समय उद्योग मन्त्रालय र त्यसअन्तर्गत विभागमा काम गरेपछि २०३४ सालमा कर विभागको महानिर्देशक बनेका थिए ।  त्यसपछि अर्थमन्त्रालयको अतिरिक्त सचिव हुँदै पछि वाणिज्य तथा आपूर्ति सचिव, पर्यटन सचिव हुँदै बहुदलीय व्यवस्थासँगै मुख्यसचिव भएका थिए । 

गौतमलाई वाणिज्य क्षेत्रमा विशेष दख्खल भएका प्रशासकका रुपमा लिने गरिन्थ्यो ।

सरकारी सेवा निवृत्त भएपछि गौतमले काठमाडौं विश्वविद्यलाय र अमेरिकाको मिनिसोटा विश्वविद्यालयमा ‘भिजिटिङ प्रोफेसर’का अध्यापन समेत गरेका थिए । गौतम ट्रान्सपरेन्सी इन्टरनेसनलका अध्यक्ष समेत भएका थिए ।

गौतम मातहत रहेर मन्त्रिपरिषद्मा काम गरेका पूर्व सचिव कृष्ण ज्ञवाली ‘क्षमतावान, इमान्दार र स्वाभिमानी प्रशासक’को रुपमा लिन्छन् । 

ज्ञवाली भन्छन्, ‘‘उहाँ गम्भीर प्रकृतिको हुनुहुन्थ्यो भने हतारिएर झ्वाट्ट निर्णय नलिने उहाँको स्वभाव थियो । मन्त्रिपरिषद्मा दह्रोसँगै अडान राख्ने प्रशासकका रुपमा लिने गरेको सुनिन्थ्यो ।’’

आफू मातहतका अधिकारीहरुसँग अधिक विश्वास गर्ने व्यक्तिको रुपमा आफूले पाएको ज्ञवाली बताउँछन् । 

‘‘उहाँसँग काम गर्दा मैले धेरै कुरा सिकेको छु । उहाँ भन्नुहुन्थ्यो, दुई चोटि नपढीकन सही नगर्नुहोस्,’’ ज्ञवालीले बाह्रखरीसँग भने, ‘‘तपाईंले यो डकुमेन्ट राम्रोसँग पढ्नुभयो होइन, अब मैले पढ्नु भनेको समय खेर फाल्नु हो । म तपाईंलाई विश्वास गर्छु ।’’
    
गौतमको २०१९ सालमा शान्ता ढकालसँग विवाह भएको थियो । गौतमका तीन सन्तान रहेका छन् ।