काठमाडौं । अमेरिकी राष्ट्रपति डोनाल्ड ट्रम्पले सोमबार साँझ इरान र इजरायलबीच युद्धविरामको घोषणा गरेका थिए । इरानको सरकारी मिडियाले पनि युद्धविराम सम्झौताको पुष्टि गरेको छ । तर, इजरायलबाट हालसम्म कुनै आधिकारिक टिप्पणी आएको छैन । त्यसैले कुन समयबाट युद्धविराम लागु हुन्छ भन्ने स्पष्ट छैन ।

इरान र इजरायलबीच युद्धविरामको घोषणा भए पनि दुवै देशबीच आक्रमणहरू जारी रहेको सीएनएनले उल्लेख गरेको छ । 

इजरायलले मंगलबार बिहान इरानबाट धेरै मिसाइलहरू प्रहार भएको पहिचान गरेको बताएको छ । जसमध्ये एउटा मिसाइल दक्षिणी क्षेत्रको एक आवासीय भवनमा ठोक्किँदा तीनजनाको मृत्यु भएको छ ।
 
इरानी सरकारी मिडियाले इजरायलले रातभर इरानको राजधानी तेहरानमा आक्रमण गरेको जनाएको छ । इजरायली सेनाले इरानबाट इजरायलतर्फ मिसाइलहरू प्रहार भएको पहिचान गरेको र रक्षात्मक प्रणालीहरू सक्रिय गरिएको बताएको छ । 

“केही समयअघि इरानबाट इजरायलतर्फ मिसाइलहरू प्रहार भएको पहिचान भएपछि इजरायलका धेरै क्षेत्रमा साइरन बजे,” इजरायल रक्षा बल (आईडीएफ)ले भन्यो,” यो समयमा, आईएएफ (इजरायली वायुसेना)ले खतराहरूलाई नष्ट गर्न आवश्यक ठाउँमा अवरोध गर्ने र प्रहार गरिरहेको छ ।”

यो मिसायल इरानका विदेशमन्त्रीले शत्रुता समाप्त भएको संकेत गरेपछि र इजरायलले तेहरानको स्थानीय समयअनुसार बिहान ४ बजेसम्म इरानमाथिको आक्रमण रोकेमा इरानले आफ्नो सैन्य जवाफ रोक्ने बताएपछि आएको हो ।

दक्षिणी इजरायलमा मिसाइल आक्रमणमा तीनजनाको मृत्यु
इजरायलको आपतकालीन सेवाले दक्षिणी इजरायलको बेयरशेवा सहरमा एक आवासीय भवनमा मिसाइल आक्रमण हुँदा तीनजनाको मृत्यु भएको बताएको छ । आपतकालीन सेवा मागेन डेभिड एडम (एमडीए)ले पहिले ४० वर्षका एक पुरुष, ३० वर्षीया एक महिला र २० वर्षको एक पुरुष गम्भीर घाइते भएको बताएको थियो । एमडीएका प्रवक्ताले अन्य ६ जनालाई हल्कादेखि मध्यम चोट लागेको बताएका छन् ।

इजरायली रक्षा बलले बासिन्दाहरूलाई बम शेल्टरमा प्रवेश गर्न निर्देशन दिएका छन् । 
  
तेहरानमा आक्रमण र विस्फोट
इजरायलले इरानको राजधानी तेहरानका विभिन्न क्षेत्रमा धेरै आक्रमणहरू गरेको इरानको सरकारी तस्निम समाचार एजेन्सीले जनाएको छ ।  

सीएनएनद्वारा पुष्टि गरिएको एक तस्बिरमा तेहरानको केन्द्रबाट ठूलो कालो धुवाँको मुस्लो देखिएको थियो । इजरायलले पहिले मेहरान र डिस्ट्रिक्ट ६ का बासिन्दाहरूलाई त्यहाँ सैन्य कारबाही गर्ने चेतावनी दिएपछि भएको हो । यसअघि, सेनाले डिस्ट्रिक्ट ७ का लागि पनि चेतावनी जारी गरेको थियो । सीएनएन