विराटनगर । प्रेस चौतारी नेपालको विराटनगरमा जारी महाधिवेशनका एकसय जना प्रतिनिधिलाई अवैधानिक करार दिएपछि विवाद सुरु भएको छ । निर्वाचन माग गर्ने प्रतिनिधिहरूको मताधिकार नरहेको भन्दै बन्दसत्रमा अध्यक्ष गणेश बस्नेतले घोषणा गरेपछि बखेडा भएको हो ।

महाधिवेशनमा मतदानमार्फत नेतृत्व चयन हुनुपर्छ भन्ने मत राख्ने सयजना प्रतिनिधिले कार्डसमेत लिइसकेका थिए । तर, अध्यक्षको घोषणापछि विवाद थप बढेको एक प्रतिनिधिले बताए ।

महाधिवेशनमा राजेश राई र गणेश पाण्डेले अध्यक्ष पदमा दाबेदारी गरिरहेका छन् । पाण्डेलाई पार्टी अध्यक्ष केपी ओलीको समर्थन रहेको बताइएको छ । राईले आफूहरू चुनावी प्रतिस्पर्धामा विश्वास गर्ने भएकोले सोही प्रक्रिया अपनाउन दबाब दिइरहेको बताउँछन् ।

महाधिवेशन स्थलमा प्रतिनिधिले हस्ताक्षर अभियान सञ्चालन गरी मतदान गराउन दबाब दिइरहेका छन् । एमाले महासचिव शंकर पोखरेलले आइतबार उद्घाटन गरेको महाधिवेशनमा भाग लिन देशभरका नौ सय प्रतिनिधि विराटनगरमा भेला भएका छन् ।