काठमाडौं । नेपाल मन्टेश्वरी ट्रेनिङ सेन्टर (एनएमटीसी)ले २५औँ वार्षिकोत्सव तथा वार्षिक सम्मेलन प्रिमियर इन्टरनेशनल आईबी कन्टिन्युम स्कुलमा सम्पन्न गरेको छ ।

बालशिक्षाका क्षेत्रका प्रतिष्ठित शिक्षक, नीति निर्माताहरू र सरोकारवालाहरू एकत्रित भइ एनएमटीसीको योगदानबारे समीक्षा गर्दै नेपालमा मन्टेश्वरी शिक्षाको भावी मार्गचित्रबारे छलफल गरेका थिए ।

औपचारिक समारोहका क्रममा एनएमटीसीकी निर्देशक पवित्रा लिम्बूले सम्बोधन गरेकी थिइन् । उनले संस्थाको २५ वर्षको यात्रा तथा बाल शिक्षामा एनएमटीसीले पुर्‍याएको प्रभावबारे प्रकाश पारिन् ।

उनले मन्टेश्वरी शिक्षकहरूको अथक समर्पण र एनएमटीसीलाई नेपालको प्रमुख प्रशिक्षण संस्थाका रूपमा स्थापित गर्न सम्पूर्ण समुदायको भूमिका उल्लेख गरिन् ।

कार्यक्रममा प्रमुख अतिथि प्रतिनिधिसभाका सभामुख देवराज घिमिरेले एनएमटीसीको नेपालमा मोटेसरी प्रशिक्षणको अगुवा भूमिकाको प्रशंसा गर्दै गुणस्तरीय प्रारम्भिक बाल शिक्षाले राष्ट्रको भविष्य निर्माण गर्न महत्त्वपूर्ण भूमिका खेल्ने कुरामा जोड दिए ।

समारोहमा बालशिक्षामा उल्लेखनीय योगदान दिएका व्यक्तित्वहरूलाई सम्मानित गरिएको थियो । एनएमटीसी एन्ड्युरिङ एक्सिलेन्सः लंगेस्ट सर्भिस अवार्ड र एनएमटीसी एलुम्नाई एक्सिलेन्स इन मोन्टेसरी एजुकेशन लिडरसिप अवार्ड विभिन्न व्यक्तिहरूलाई दिइयो ।

यसैगरी, प्रिमियर इन्टरनेशनल आईबी कन्टिन्युम स्कुलका आईबीडीपी विद्यालय काउन्सलर तथा मनोवैज्ञानिक कर्णव प्रभाकरले ‘न्यूरो डेभलपमेन्टल डिसअर्डर र प्रारम्भिक बाल विकास’ विषयमा सेमिनार प्रस्तुत गरेका थिए ।

त्यस्तै, स्पिच एन्ड हियरिङ एसोसिएसन अफ नेपालकी उपाध्यक्ष तथा भाषिक–सुनाइ विशेषज्ञ नीलम लामा दाहालले 'भाषा तथा श्रवण विकासः महत्त्वपूर्ण चरणहरू र प्रारम्भिक जोखिम पहिचान' विषयमा अर्को सत्र प्रस्तुत गरेकी थिइन् ।