काठमाडौं । सहिद स्मारक ‘बी’ डिभिजन लिगमा बाँसबारी क्लबले रानी कर्नर टिम (आरसीटी) विरुद्ध ४–२ को सानदार जित निकाल्दै पहिलो तीन अंक जोडेको छ ।

बिहीबार सातदोबाटोस्थित एन्फा मुख्यालयमा सम्पन्न दोस्रो खेलमा आरसीटीविरुद्ध जित निकाल्न बाँसबारीका बिके राईले दुई गोल गर्दा सरोज दर्लामीमगर र संगम ठकुरीले समान एक गोल गरे । आरसीटीका लागि सुदिप लामा र मन्जील खड्काले गोल गरेता पनि खेलमा फर्कन भने पर्याप्त भएन ।

१६औँ मिनेटमा बाँसबारीका सरोजले टिमलाई पहिलो अग्रता दिलाए । २५औँ मिनेटमा बिके राईले अग्रतालाई दोब्बर बनाए । ५२औँ मिनेटमा आरसीटीका मन्जील खड्काले एक गोल फर्काए ।

७४औँ मिनेटमा सुदिप लामाको गोलमा आरसीटीले पुनरागमन गर्‍यो । लगतै चार मिनेटपछि बाँसबारीका ठकुरीले ७८औँ मिनेटमा पेनाल्टी अवसरलाई गोलमा परिणत गर्दै टोलीलाई अग्रतामा राखे । ८४औँ मिनेटमा बिके राईले टिमका निम्ति निर्णायक गोल गरे ।

खेलबाट बाँसबारीले पहिलो जित निकाल्दै तीन अंक हाँसिल गरेको छ । आरसीटीले दोस्रो हार खेप्दै शून्य अंकमा सीमित भएको छ ।