काठमाडौं । प्रधानमन्त्री कपमा नेपाल पुलिस क्लबले सुदूरपश्चिम प्रदेशलाई ६१ रनले पराजित गरेको छ ।

सोमबार सिद्धार्थनगर रंगशालामा सम्पन्न खेलमा पुलिसले प्रस्तुत गरेको १६१ रनको लक्ष्य पछ्याउने क्रममा सुदूरपश्चिमले २८.३ ओभरमा सबै विकेट गुमाएर ९९ रनमात्र बनाउन सक्यो ।

सुदूरपश्चिमका शेर मल्लले सर्वाधिक ३२ रन बनाए । मिलन बोहराले २३ रन थप्दा टेक रावलले १२ रन जोडे । यसबाहेक अन्य ब्याटरले दोहोरो अंकमा रन जोड्न सकेनन् ।

पुलिसका ललितनारायण राजवंशीले ६ विकेट लिए । उनले सात ओभर बलिङ गर्दा १६ रन मात्र खर्चिए । यस्तै, सागर ढकालको नाममा दुई विकेट लिँदा करण केसीको नाममा एक विकेट रह्रयो ।

त्यसअघि टस जितेर ब्याटिङ रोजेको पुलिसले ४७ ओभरमा सबै विकेट गुमाएर १६० रनको योगफल बनाएको थियो ।

पुलिसका दीपेन्द्रसिंह ऐरीले ४१ रन जोडे । आरिफ शेखले ४० रन बनाए । सागर ढकालले २२, दिलिप नाथले १९ र अमित श्रेष्ठले १८ रन प्रहार गरे ।

सुदूरपश्चिमका सूर्य श्रेष्ठले चार विकेट लिए । भोजराज भट्टले तीन विकेट लिँदा शेर मल्लले दुई विकेट र हेमन्त धामीले एक विकेट लिए ।

प्रतियोगितामा पुलिस अपराजित छ । जितसँगै पाँच खेलबाट १० अंक जोडेको पुलिस तालिकाको शीर्ष स्थानमा छ । समान खेलबाट दुई अंक जोडेको सुदूरपश्चिम तालिकाको पुछारमा छ ।