काठमाडौं । राष्ट्रिय स्वतन्त्र पार्टी (रास्वपा)का कार्यवाहक सभापति डोलप्रसाद अर्यालले वैदेशिक रोजगारीमा जाने श्रमिकलाई सम्झौताअनुसार पारिश्रमिक दिलाउन सरकारको ध्यानाकर्षण गराएका छन् । सोमबार (चैत ४) प्रतिनिधिसभा बैठकमा उनले वैदेशिक रोजगारीमा जाने श्रमिक ठगिएको, समस्यामा परेको र दूतावासले बेवास्ता गर्ने गरेको गुनासो आइरहेको भन्दै यस्तो ध्यानाकर्षण गराएका हुन् ।

“दैनिकजसो मेरो सचिवालयमा ठगिएको, समस्या परेको र दूतावासमा समस्या राख्दा बेवास्ता गर्ने गरेको गुनासो आउने गरेको छ,” उनले भने ।

यूएई र मलेसियाको सेक्युरिटी कम्पनीमा कार्यरत श्रमिकले सम्झौताअनुसार पारिश्रमिक, बिदा र औषधि उपचार नपाएको उनले उल्लेख गरे । उनले म्यानपावर कम्पनीले श्रमिकलाई भनेअनुसारको सेवा सुविधा नदिने र गुनासो गर्दा धम्क्याउने गरेको बताए ।

“हालै यूएई र मलेसियाको सेक्युरिटी कम्पनीमा कार्यरत श्रमिकहरूले सम्झौताअनुसार पारिश्रमिक, बिदा र औषधि उपचार नपाएको गुनासो हामीमाझ गर्नुभएको छ,” उनले भने, “यता, म्यानपावरले मोटो रकम असुल्ने र भनेजस्तो काम नदिएको गर्दा श्रमिकहरूलाई थर्काउने र धम्क्याउने गरेको उनीहरू बताउँछन् ।”

मुलुक रेमिट्यान्सले चलिरहेको अवस्थामा श्रमिकलाई सम्झौताअनुसारको सेवा सुविधा दिलाउन र दुःख दिने म्यानपावर कम्पनीलाई कानुनी दायरामा ल्याउन उनले माग गरे । “विदेशमा पसिना बगाएर पठाएको रेमिट्यान्सले टेको दिएको विदितै छ । तर, उनीहरूको पीडा भने हामीले बुझ्न सकेका छैनौँ,” उनले भने, “त्यसैले नेपाली श्रमिकहरूको अवस्था बुझेर सम्झौताअनुसारकै सेवा सुविधा दिलाउन र श्रमिकलाई दुःख दिने म्यानपावर कम्पनीहरूलाई कानुनी दायरामा ल्याउन श्रम मन्त्रालयको ध्यानाकर्षण गराउन चाहन्छु ।”

उनले बर्सातको समय नजिकिएकाले बाढीको जोखिम भएका नदीहरूमा तटबन्धको व्यवस्था गर्न समेत माग गरे । न्युज एजेन्सी नेपाल