काठमाडौं । सरकारले ल्याएका पाँच अध्यादेश बुधबारको प्रतिनिधिसभाबाट स्वीकृत गर्ने तयारी भएको छ । संसद्का महासचिव पद्मप्रसाद पाण्डेले जारी गरेको सम्भावित कार्यसूचीमा अध्यादेश स्वीकृतका लागि प्रस्तुत गर्ने उल्लेख छ ।

कार्यसूचीअनुसार प्रधानमन्त्री केपी शर्मा ओलीले ‘सुशासन प्रवर्धन तथा सार्वजनिक सेवा प्रवाहसम्बन्धी नेपाल ऐनलाई संशोधन गर्ने अध्यादेश, २०८१ लाई स्वीकृत गरियोस्, भन्ने प्रस्ताव प्रस्तुत गर्ने जनाइएको छ ।

त्यस्तै, उपप्रधान तथा अर्थमन्त्री विष्णुप्रसाद पौडेलले ‘आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८१ लाई स्वीकृत गरियोस् भन्ने प्रस्ताव प्रस्तुत गर्नेछन् । पौडेलले नै ‘निजीकरण (पहिलो संशोधन) अध्यादेश, २०८१ लाई स्वीकृत गरियोस् भन्ने प्रस्ताव प्रस्तुत गर्ने कार्यसूचीमा उल्लेख छ ।

त्यस्तै, पौडेलले “आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने अध्यादेश, २०८१ लाई स्वीकृत गरियोस् भन्ने प्रस्ताव प्रस्तुत गर्ने तय भएको छ ।

भूमि व्यवस्था, सहकारी तथा गरिबी निवारणमन्त्री बलराम अधिकारीले ‘सहकारीसम्बन्धी नेपाल ऐनलाई संशोधन गर्ने अध्यादेश, २०८१ लाई स्वीकृत गरियोस् भन्ने प्रस्ताव प्रस्तुत गर्ने सम्भावित कार्यसूचीमा जनाइएको छ ।

भूमिसम्बन्धी अध्यादेश भने कार्यसूचीमा राखिएको छैन । ६ वटा अध्यादेश माघ १८ गतेको संसद् बैठकमा पेस गरिएको थियो । माघ २४ गतेको बैठकबाट स्वीकृत गर्ने तयारी थियो । तर, जनता समाजवादी पार्टी, नेपालले अध्यादेशको पक्षमा उभिने सन्देश नदिएपछि अध्यादेश अघि बढाउन रोकिएको थियो । पाँच वटा अध्यादेश अघि बढाउन जसपा नेपालको सहमति भएको भन्दै सत्तापक्ष बिहीबारको राष्ट्रियसभा बैठकबाट अध्यादेश स्वीकृत गर्ने तयारीमा छ ।

संसद्मा पेस भएको ६० दिनभित्र अध्यादेश प्रतिस्थापन विधेयक ल्याएर पारित गर्नुपर्ने हुन्छ । माघ १८ गते एक महिना बितिसकेको छ ।