काठमाडौं । त्रिभुवन विश्वविद्यालय (त्रिवि)ले आउँदो चैत ५ गते हुने स्वतन्त्र विद्यार्थी युनियन (स्ववियु) निर्वाचनको प्रक्रिया सुरु गरेको छ ।

त्रिविका आंगिक, सम्बन्धनप्राप्त क्याम्पसमा सोमबार बेलुकासम्म विभिन्न विद्यार्थी संगठनले आफ्नो संघ–संगठनको नाम दर्ता गराएका विद्यार्थी कल्याण तथा खेलकुद निर्देशनालयका निर्देशक पशुपति अधिकारीले जानकारी दिए । “विद्यार्थी संगठनले आ–आफ्नो संगठनको नाम निर्वाचनका लागि दर्ता गराउनुभएको छ,” उनले भने, “विगतभन्दा धेरै क्याम्पसमा यसपटक निर्वाचन हुन्छ ।”

निर्वाचन कार्यतालिकाअनुसार, बुधबार (फागुन २१) मतदाता सूची प्रकाशन र फागुन २७ गते बिहान ११ देखि दिउँसो २ बजेसम्म प्रत्यक्ष तथा समानुपातिक उमेदवारको मनोनयन दर्ता गरिनेछ । त्रिविले मतदान आउँदो चैत ५ गते बिहान ८ देखि अपराह्न ४ बजेसम्मका निम्ति तोकेको छ ।

अनेरास्ववियुका अध्यक्ष समिक बडालले निर्वाचनका निम्ति सबै क्याम्पसमा आफ्नो संगठनको मनोनयन गरिएको जानकारी दिए ।

नेपाल विद्यार्थी संघका प्रवक्ता सुरज सेजुवालले पनि सबै क्याम्पसमा संगठनको नाम दर्ता गराइएको बताए ।

अनेरास्ववियु (क्रान्तिकारी)का महासचिव रोशन मगरले देशभर नै निर्वाचन हुने क्याम्पसमा संगठन दर्ता गराइएको जानकारी दिए ।

त्रिविले ‘स्ववियु निर्वाचसम्बन्धी निर्देशिका’ आचारसंहिता जारी गरिसकेको छ । चैत ५ गते एकैदिन देशभरिका त्रिविका ६२ आंगिक र एक हजार ४० सम्बन्धन प्राप्त क्याम्पसमा स्ववियु निर्वाचनमा हुनेछ । निर्वाचनमा २८ वर्षे उमेरहद र मिश्रित निर्वाचन प्रणालीमा व्यवस्था गरिएको छ । रासस