वासिङटन । अमेरिकी फेडरल ब्युरो अफ इन्भेस्टिगेसन (एफबीआई)ले उत्तर कोरियामाथि गएको हप्ता एक अर्ब ५० करोड डलरको डिजिटल सम्पत्ति चोरी गरेको आरोप लगाएको छ । यो इतिहासमा सबैभन्दा ठूलो क्रिप्टो चोरी हो ।

“उत्तर कोरिया क्रिप्टोकरेन्सी एक्सचेन्ज बाइबिटबाट लगभग एब अर्ब ५० करोड अमेरिकी डलर मूल्यबराबरको भर्चुअल सम्पत्ति चोरीका निम्ति जिम्मेवार थियो,” एफबीआईले भनेको छ ।

ब्युरोले लाजारस ग्रुप पनि भनिने ट्रेडरट्रेटर एक समूह चोरीको पछाडि रहेको जनाएको छ । “उनीहरू द्रुत गतिमा अघि बढिरहेका छन् र चोरी गरिएको केही सम्पत्तिलाई बिटक्वाइन र अरू भर्चुअल सम्पत्तिमा परिवर्तन गरिसकेका छन्, जुन धेरै ब्लकचेनहरूमा हजारौँ ठेगानामा फैलिएका छन्,” ब्युरोले भनेको छ, “यी सम्पत्तिहरू थप रूपमा धुलाइ गरिने र अन्ततः फिएट मुद्रामा परिवर्तन गरिने अपेक्षा गरिएको छ ।”

उत्तर कोरियाली नेता किम जोङ उनको उपहास गर्ने फिल्म ‘द इन्टरभ्यु’को बदलामा सोनी पिक्चर्समा‘ ह्याकिङ’ गरेको आरोप लागेपछि लाजारस समूहले एक दशकअघि कुख्याति प्राप्त गरेको थियो ।

उत्तर कोरियाको साइबर–युद्ध कार्यक्रम कम्तीमा सन् १९९० को मध्यदेखि सुरु भएको हो । २०२० को अमेरिकी सैन्य प्रतिवेदनानुसार, त्यस बेलादेखि यो ६ हजार सदस्य भएको साइबर–युद्ध एकाइ बनेको छ, जसलाई ब्युरो १२१ भनिन्छ र यो धेरै देशबाट सञ्चालन हुन्छ । रासस/एएफपी