काठमाडौं । ओमानमा काम गरिरहेका तीन भारतीय तलब नपाएपछि भागेर स्वदेश फर्किएका छन् । देश फर्कन उनीहरूले डुंगा चोरेर समुद्री मार्ग रोजेका छन् ।

तमिलनाडुका ५० वर्षीय जेम्स फ्र्यांकलिन मोसेस, ५० वर्षीय रोबिन्स्टन र ३८ वर्षीय डेरोस अल्फोन्सो डुंगाबाट तीनहजार किलोमिटर दुरी पार गरिसकेका थिए । तर, उनीहरूलाई कर्नाटकको उडुपी तट नजिकै भारतीय तटरक्षकले पक्राउ गरेको थियो ।

तीनै जनालाई सोमबार उडुपीको अदालतमा पेस गरिएको थियो । अदालतले उनीहरूलाई न्यायिक हिरासतमा पठाएको छ ।

भारतीय सञ्चारमाध्यमका अनुसार, तीनैजना ओमानको माछा मार्ने कम्पनीमा काम गर्थे । तर, आफूहरूले समयमै तलब नपाउने गरेको र दुर्व्यवहार भोगिरहेका थिए । यस्तो अवस्थामा तीनै जनाले घर फर्कने निर्णय लिएका थिए ।

तर, ओमानी कम्पनीले उनीहरूको राहदानी जफत गरेको थियो । त्यसैले उनीहरूसँग समुद्री मार्गबाहेक घर फर्कने अर्को विकल्प थिएन । तीनजना माछा मार्ने डुंगा चोरेर भागेका हुन् ।

तीन जनाले फेब्रुअरी १७ मा दिउँसो ३ बजे पूर्वी ओमानको दुक्म बन्दरगाह छाडेका थिए । ६ दिनको यात्रापछि फेब्रुअरी २३ मा उनीहरू उडुपीको सेन्ट मेरी टापुनजिकै डुंगाबाट भारतीय जलक्षेत्रमा प्रवेश गरेका थिए । ओमानी डुंगा देखेपछि एक स्थानीय माझीले तटीय सुरक्षा प्रहरीलाई जानकारी गराएका थिए ।

जानकारी पाएपछि भारतीय तटरक्षक र तटीय सुरक्षा प्रहरीले दिउँसो ४:३० बजेतिर सेन्ट मेरी टापु नजिकैबाट उनीहरूलाई पक्राउ गरेको हो ।

सोधपुछको क्रममा उनीहरू जीपीएसको मद्दतले झन्ड‌ै तीनहजार किलोमिटरको समुद्री यात्रा तय गरेर सेन्ट मेरी टापु पुगेको खुलासा भएको हो ।