सिड्नी । एसोसिएसन अफ नेपाली ओरिजिन (एएनओ)ले शाखा विस्तारको क्रममा अस्ट्रेलियामा नेपालीभाषी समेटेर नयाँ कार्यसमिति घोषण गरेको छ । भुटानीमुलका नेपालीभाषी युवा डम्वर ढुङ्गेलको अध्यक्षतामा एएनओ अस्ट्रेलिया शाखा गठन भएको हो । 

उपाध्यक्षमा दिनेश खतिवडा, महासचिव गगन विडारी, उप महासचिव राजकुमार श्रेष्ठ, कोषाध्यक्ष लिला भण्डारी रहेका छन् । सदस्यहरूमा निकेश शर्मा, राम खतिवडा, युवराज शर्मा, हरि पोखरेल, खगेन्द्र आचार्य, आशिका राई, बिजय बस्नेत, सरिता ढकाल, भवानी ढकाल, पुष्प आचार्य, गोविन्द गौतम रहेका छन् ।

पुर्ख्यौली थातथलो नेपाल भएर भुटान, वर्मा, भारतलगायत देशबाट विश्वका विभिन्न देशमा छरिएर रहेका नेपालीलाई एएनओले समेटेको एएनओ अन्तर्राष्ट्रियका महासचिव सिएम भट्टराईले बताए ।

अस्ट्रेलियाका लागि नेपाली राजदूत चित्रलेखा यादवले भाषा र संस्कृति जोगिए नेपाली जोगिने भन्दै सबैले यसमा येगदान दिनुपर्ने बताइन् । उनले नेपालीभाषी समुदायलाई नेपालको संमृद्धिमा जुट्न आग्रह गरिन् । 

गतवर्ष मार्च २४ मा थाइल्यान्डको बैंककमा ३२ देशका नेपालीभाषीले भुटानी नेपालीमूलका अमेरिकन व्यवसायी डिल्ली अधिकारीको नेतृत्वमा एएनओ गठन भएको थियो । यसअघि यसको शाखा वेलायत र पोर्चुगलमा गठन गरिसकिएको केन्द्रीय सदस्य भीम बस्नेतले बताए ।