विराटनगर । कोसी प्रदेशका सांसदले ताप्लेजुङको पाथीभरा मन्दिर (मुकुम्लुङ) क्षेत्रको समस्या समाधान गर्न संघीय सरकारको ध्यानाकर्षण गराएका छन् ।

आइतबार कोसी प्रदेशसभा बैठकमा नेकपा (एकीकृत समाजवादी)की सांसद विद्या चाम्लिङले पाथीभरा क्षेत्रको पछिल्लो घटनाक्रमले प्रदेश नै आक्रान्त भएको बताइन् । “दिनानुदिन मात्र होइन, रातमा पनि आन्दोलन भइरहेको छ,” उनले भनिन्, “ताप्लेजुङको आन्दोलन वार्ता गरेर समाधान गर्नुपर्छ ।”

एकीकृत समाजवादीकी अर्की सांसद खिनुलङ्वा लिम्बूले फुङलिङमा लाठीचार्ज, कुटपिट, हवाईफायर र अश्रुग्यास हान्ने काम भएको भन्दै सरकारको ध्यानाकर्षण गराइन् । उनले भनिन्, “घरमा सुतेकाहरूलाई समेत राज्यशक्ति प्रयोग गरेर धरपकड गरिएको छ । निषेधाज्ञा जारी गरिएको छ । २५० जनालाई पक्राउ गरिएको छ । दर्जनौँ बेपत्ता, सञ्चारकर्मीलाई कुटपिट गर्ने, सञ्चार सामग्री खोस्ने काम गरिएको छ ।”

उनले राज्यपक्षबाट मुकुम्लुङ समर्थकमाथि बर्बर ढंगले दमन गरिएको बताइन् । “नागरिकप्रति जिम्मेवार भई शान्ति सुरक्षा कायम गराउनुपर्छ, नकि राज्यशक्तिको दुरुपयोग हुनुपर्छ,” उनले भनिन्, “गृहमन्त्रीले राजीनामा दिनुपर्छ । क्रूर दमन रोकिनुपर्छ ।”

नेपाली कांग्रेसका सांसद प्रदीपकुमार सुनुवारले ताप्लेजुङमा ‘नो केबलकार’ पक्षधले गरेको कार्यक्रमका क्रममा घाइते भएकाहरूलाई संघ र प्रदेश सरकारले उपचारको प्रबन्ध गर्नुपर्ने माग गरे । “धार्मिक सहिष्णुता खलल गर्ने काम भएको छ । प्रदेशका सांसदहरूलाई निषेध गर्ने भन्ने सुन्नमा आएको छ,” उनले भने, “प्रदेशले पनि वार्ता समिति बनाएको थियो । वार्ता कहाँ पुगेको छ, प्रदेश सरकारको धारणा के हो ? मन्त्रीस्तरीय वार्ता समिति बनाएर संघीय सरकारले समाधानमा चासो दिनुपर्छ ।”

राष्ट्रिय प्रजातन्त्र पार्टी (रापपा)का सांसद सविना बजगाईंले ताप्लेजुङमा निषेधाज्ञाले समस्या समाधान हुन्छ ? भन्ने प्रश्न गरिन् । उनले सरकारले समस्या समाधानमा चासो दिनुपर्ने माग गरिन् ।