काठमाडौं । दुर्गेश थापाको गीत ‘दुस्मन हेरेको हेरै...’ चर्चित हुँदा उनी यतिबेला मेलामहोत्सवका सांगीतिक कार्यक्रममा व्यस्त छन् । 

आफूलाई गायकभन्दा पनि पफर्मर भएको बताउने दुर्गेश महिनामा ३० दिन नै स्टेज कार्यक्रममा व्यस्त हुने गरेको बताउँछन् ।

शुक्रबार फोन सम्पर्क गर्दा दुर्गेश सल्यानमा थिए । शनिबार काठमाडौं र नवलपुरमा कार्यक्रम रहेको बताएरहेका थिए । बुधबार उनले सामाजिक सञ्जालमा एउटा भिडियो राखेका थिए । जहाँ उनी हेलिकोप्टरमा थिए । 

हेलिकोप्टर चढेर स्टेज कार्यक्रममा हो भन्ने प्रश्नमा उनले भने– हो । 

आयोजकले नै हेलिकोप्टरको भाडा व्यहोर्छन् ? “होइन, मैले आफैँ पैसा तिरेर हेलिकोप्टर चढेर कार्यक्रममा गएको हुँ,” दुर्गेश बाह्रखरीसँग भन्छन्, “मैलै झुक्किएर दुईवटा ठाउँको कार्यक्रमको डेट एकै दिनलाई दिएँछु, त्यसैले हेलिकोप्टर नै प्रयोग गर्नुपर्‍यो ।” 

बुधबार उनले मकवानपुर र नुवाकोटमा हुने दुईवटा कार्यक्रमका लागि आयोजकलाई आउँछु भनेर निश्चित गरेका थिए । त्यसैले उनी यो दिन सुरुमा काठमाडौंबाट हेलिकोप्टर लिएर मकवानपुरको कार्यक्रममा गएर प्रस्तुति दिए । त्यसपछि दुर्गेश हेलिकोप्टर चढेर नै नुवाकोट पुगेर कार्यक्रम गरे ।

• दुर्गेशले छाडेको गीतमा पलको मोडलिङ, के हो र ‘हट र पट’ ?

“पैसा कति लाग्योभन्दा पनि मैले बचन दिएपछि पूरा गर्नुपर्छ । म आफैँले झुक्किएर दुईवटा कार्यक्रम ओके गरेँछु,” दुर्गेश प्रष्ट पार्छन्, “पैसा मेरै खर्चभयो । तर, मेरा लागि पैसाभन्दा पनि दर्शक र स्रोता ठूलो कुरा हो । दर्शक/स्रोतालाई ढाँट्नु हुन्न भनेर मैले आफ्नै खर्चमा हेलिकोप्टर चढेर गएको हुँ ।” 

दुर्गेशले गत महिना माघ १२ देखि फागुन १ गतेसम्म लगातार आफू कुन दिन कहाँ कार्यक्रम गर्दैछु भनेर फेसबुकमा अपडेट गरेका थिए ।