काठमाडौं । श्रीलंकन क्रिकेट टिममाथि आक्रमण भएको १६ वर्षपछि पाकिस्तानमा पुनः आईसीसीको ठूलो क्रिकेट प्रतियोगिता आयोजना हुँदै छ । डेढ दशकअघि नकाबधारी आतंकवादी टोलीले गदाफी रंगशाला जाँदै गरेको श्रीलंकन टोलीको बसमा आक्रम गरेको थियो ।

सन् २००९ को मार्च ३ मा भएको यो घटना पाकिस्तानी क्रिकेटका निम्ति निक्कै सकस बन्यो । त्यस घटनाको ६ वर्षसम्म पाकिस्तानले कुनै पनि अन्तर्राष्ट्रिय क्रिकेट खेल आयोजना गर्न पाएन । सन् २०१५ मा जिम्बाब्वेले पाकिस्तानको भ्रमण गरेपछि भने यस दक्षिण एसियाली मुलुकप्रति विश्व क्रिकेटले विश्वास बढाउँदै लगेको छ ।

सन् २०१७ मा आईसीसीले लाहोरमा फाफ डु प्लेसिसको कप्तानीमा रहेको विश्व–११ को तीन खेल आयोजना गरेको थियो । त्यसपछि श्रीलंका, वेस्ट इन्डिज र बंगलादेशले समेत शृंखलाका निम्ति पाकिस्तानको भ्रमण गरिसकेका छन् ।

पछिल्लोसमय निरन्तर अन्तर्राष्ट्रिय शृंखला आयोजना गरिरहेको पाकिस्तानले सन् २०२१ मा विश्व क्रिकेटको सर्वोच्च निकाय आईसीसीबाट च्याम्पियन्स ट्रफी–२०२५ आयोजनाको अधिकार पाएको थियो ।

पाकिस्तान भ्रमण नगर्ने अडानमा चिर–प्रतिद्वन्दी भारत
विश्व क्रिकेटका चिर–प्रतिद्वन्दीका रूपमा परिचित भारत–पाकिस्तानको खेल सधैँ बहुप्रतिक्षित रहने गर्दछ । तर, भारतले पाकिस्तानको भ्रमण नगरेको करिब दुई शतक नै पुगिसक्यो । यसैकारण यसपटक पनि भारतले पाकिस्तानको भ्रमण नगर्ने निर्णयमा अडिक रहनु क्रिकेट प्रेमीका निम्ति कुनै नौलो विषय होइन ।

भारत आफ्नो अडानमा अडिग रहेपछि आईसीसीले पाकिस्तानमा हुने प्रतियोगिता ‘हाइब्रिड मोडेल’मा सञ्चालन गर्ने सहमति बनिसकेको छ । जसअनुसार प्रतियोगिताका निम्ति बाँकी ६ टोलीले पाकिस्तानको यात्रा गरे पनि भारतका खेल भने ‘तटस्थ’ स्थानमा हुनेछ । यसका निम्ति आईसीसीले युनाइटेड अरब इमिरेट्स (यूएई)लाई ‘तटस्थ’ भूमिको रूपमा छनोट गरेको छ ।

पाकिस्तानमाथि सुरक्षाको भारी जिम्मेवारी
विश्वमाझ अझै पनि पाकिस्तानले आतंकवाद पूर्ण रूपमा निर्मूल भइसकेको सन्देश दिन सकेको छैन । पछिल्लो दशकयता यस्ता गतिविधिमा ठूलै कमी आएको छ । तर, विश्वले विश्वास गर्न सक्ने वातावरण भने पाकिस्तानले बनाउन बाँकी नै छ । यस अर्थमा यो प्रतियोगिता विश्व खेलकुद मञ्चमा पाकिस्तानको छवि सुधार्ने महत्त्वपूर्ण बन्ने निश्चित छ ।

च्याम्पियन्स ट्रफी आफैँमा दाउपेचको प्रतियोगिता भए पनि क्रिकेट समर्थकसामु भने यसले बेग्लै पहिचान स्थापित गराइसकेको छ । आईसीसी वरीयताको शीर्ष आठ टिमले प्रतिस्पर्धा गर्ने यस प्रतियोगिताको पछिल्लो संस्करण आयोजना भएको नै आठ वर्ष पुगिसक्यो । जहाँ पाकिस्तानले फाइनलमा भारतविरुद्ध एकतर्फी जित निकाल्दै उपाधि उचालेको थियो ।