काठमाडौं । अर्थ मन्त्रालयका सहसचिवहरूको सरूवा भएसँगै भन्सार विभाग र आन्तरिक राजस्व विभागको महानिर्देशकमा तीनजनाको चर्चा हुन थालेको छ ।

भन्सार विभागका महानिर्देशक हरिशरण पुडासैनी राष्ट्रिय योजना आयोग र आन्तरिक राजस्व विभागका महानिर्देशक रामप्रसाद आचार्य संघीय मामिला तथा सामान्य प्रशासन मन्त्रालय सरूवा भएपछि अबको महानिर्देशक को हो भनेर चर्चा हुन थालेको हो ।

यसै चर्चामा अर्थ मान्त्रालयका सह–सचिव महेश भट्टराई, मदन दहाल र महालेखा नियन्त्रक कार्यालयका सहमहालेखा नियन्त्रक श्यामप्रसाद भण्डारीको चर्चा हुन थालेको हो । भट्टराई अर्थ मन्त्रालयको योजना, अनुगमन तथा मूल्यांकन महाशाखाका प्रमुख हुन् । त्यस्तै, दहाल प्रशासन महाशाखा प्रमुख हुन् । भण्डारी महालेखा नियन्त्रक कार्यालयको सहमहालेखा नियन्त्रक हुन् ।

भण्डारी र भट्टराईको भन्सार विभागका महानिर्देशक हुने चर्चा छ । तर, भट्टराईले भने राजस्व विभागको महानिर्देशकमा इच्छा राखेको अर्थ मन्त्रालय स्रोतको भनाइ छ । 

भण्डारीले भने भन्सार विभागको महानिर्देशकमा इच्छा राखेका छन् । तर, दहाल आन्तरिक राजस्व विभागको महानिर्देशक भए भने भन्सार विभागको महानिर्देशकमा भट्टराईको सम्भावना बढी रहेको स्रोतको दाबी छ । किन भने भट्टराईले त्रिभुवन विमानस्थल भन्सार कार्यालयको प्रमुख, वाणिज्य आपूर्ति तथा उपभोक्ता संरक्षण विभागको महानिर्देशक तथा राष्ट्रिय योजना आयोगको आर्थिक व्यवस्थापन महाशाखा प्रमुखको जिम्मेवारीमा रहेर काम गरिसकेका छन् ।

त्यस्तै, मन्त्रालय वित्तीय क्षेत्र व्यवस्थापन तथा संस्थान समन्वय महाशाखाका सहसचिवद्वय दीर्घराज मैनाली र नारायणप्रसाद रिसालको पनि सरूवा गरिएको छ । यो महाशाखा एउटा भए पनि मैनालीलाई व्यवस्थापन गर्न मन्त्रीले दुईवटा सहसचिवलाई जिम्मेवारी दिएका थिए ।