प्रयागराज । भारतको उत्तर प्रदेशको प्रयागराजमा चलिरहेको कुम्भ मेलामा माघ पूर्णिमा स्नान सुरु भएको छ । यसका लागि ठूलो संख्यामा भक्तजनहरू त्रिवेणी संगममा पुगिरहेका छन् ।

मेलामा कुनै पनि अप्रिय घटना हुन नदिन कडा सुरक्षा व्यवस्था मिलाइएको छ ।

समाचार एजेन्सी एएनआईले अतिरिक्त मेला अधिकारी विवेक चतुर्वेदीलाई उदृत गर्दै आज मेलामा भक्तजनहरूको ठूलो भीड हुने सम्भावनालाई ध्यानमा राख्दै सुरक्षा व्यवस्था कडा पारिएको जनाएको छ ।

“आज माघ पूर्णिमा स्नान हो । यसपालि मेलामा अनपेक्षित भीड भएको छ,” विवेक चतुर्वेदीले भने, “रातमा पनि भक्तजनहरू आउनेक्रम जारी रहन्छ । प्रशासनले यसको लागि पूर्ण तयारी गरेको छ ।”

चतुर्वेदीले जल प्रहरी घाटहरूमा तैनाथ रहेको बताए । वाच टावर निर्माण गरिएको र ट्राफिक डाइभर्सन पनि लागु गरिएको उनले जानकारी दिएका छन् । 

जनवरी २९ मा कुम्भका केही स्थानमा भागदौड मच्चिएको थियो । उक्त भागदौडमा थुप्रै भक्तजनको मृत्यु भएको थियो । उक्त घटना दोहोरिन नदिन प्रशासनले सतर्कता बढाएको छ । बीबीसी