काठमाडौं । जनता समाजवादी पार्टी (जसपा) नेपालले भूमिसम्बन्धी अध्यादेशको विपक्षमा मतदान गर्ने निर्णय गरेको छ । आज सिंहदरबारमा बसेको संसदीय दलको बैठकले भूमिसम्बन्धी अध्यादेश देश हितविपरीत रहेको निष्कर्ष निकालेको हो । 

“भूमिसम्बन्धी केही नेपाल ऐनलाई संशोधन गर्न बनेको अध्यादेश दीर्घकालीन रूपमा देश र समग्र राष्ट्रको हितविपरीत रहेको छ । यस अध्यादेशको विरोधमा उभिने र यसको विपक्षमा मतदान गर्ने निर्णय गरिन्छ,” बैठकपछि अध्यक्ष उपेन्द्र यादवले जारी गरेको विज्ञप्तिमा भनिएको छ ।

अन्य पाँचवटा अध्यादेशलाई भने समर्थन गर्न र मतदान गर्न सकिने जसपाले बताएको छ ।

सरकारले ल्याएका ६ अध्यादेश राष्ट्रियसभाबाट पारित गर्न जसपा नेपाल निर्णायक छ ।