काठमाडौं । नेपाल प्रहरीको उपत्यका अपराध अनुसन्धान कार्यालयको टोलीले शुक्रबार (माघ २५) राति एक भियतनामी युवकलाई पक्राउ गर्‍यो । कार्यालयको ललितपुरको टोलीले २३ वर्षीय माई हाङ किन्हालुनलाई कलंकीबाट पक्राउ गरेको हो ।

प्रहरीका अनुसार, उनले एक चार वर्षीय बालकलाई अपहरण गरेर बन्धक बनाएका थिए । ललितपुरको पाटनबाट बिहीबार (माघ २४) उनले सरिता तामाङका चार वर्षीय छोरालाई अपहरण गरेका थिए । अपहरण गरेर कलंकी पुर्‍याएको खुलेपछि उनी पक्राउ परेका हुन् ।

पक्राउ परेका किन्हालुनमाथि प्रहरीले थप अनुसन्धान गरिरहेको छ । पाटन दरबार स्क्वायरमा भेटिएका ती बालकलाई उनले विभिन्न खानेकुरा किनेर खुवाएर प्रलोभनमा पारेपछि अपहरण गरेको प्रहरीको प्रारम्भिक अनुसन्धानका क्रममा खुलेको छ ।

अनुसन्धानमा संलग्न एक प्रहरीका अनुसार, गएको डिसेम्बर २५ (पुस १०) मा किन्हालुन क्रिसमस पर्व मनाउन पाटन पुगेका थिए । त्यहाँ पीडित बालक र उनका दाइसित भेट भएको थियो ।

किन्हालुनले त्यो दिन पीडित बालकका दाइसित परिचय गरे । बालकलाई आलुचिप्ससहित केही खानेकुरा पनि किनिदिए । किन्हालुन त्यसपछि पनि दिनहुँजसो पाटन पुग्ने गरेको खुलेको छ ।

सामान्य परिवारका ती बालक पाटन आसपास डुल्ने गर्थे । माघ २४ गते बेलुका करिब ८ः३० बजे भने पाटनबाट बालक अपहरणमा परेको सूचना प्रहरीले पायो । सोही सूचनापछि खटिएको प्रहरी टोलीले किन्हालुनलाई कलंकीस्थित इलाम मेची गेस्टहाउसमा बालक बन्धक बनाएर राखेको अवस्थामा पक्राउ गरेको हो ।

यसरी परे पक्राउ
प्रहरीले पाटन कृष्णमन्दिर क्षेत्रबाट बालक अपहरणमा परेको सूचना पाएको थियो । त्यसैले मन्दिर क्षेत्रको निगरानीका निम्ति राखिएका सीसीटीभी फुटेज प्रहरीले हेर्‍यो ।

कृष्णमन्दिरनजिकै ढालचा चोकबाट बालक र एक युवक शंकास्पद तरिकाले ट्याक्सीमा चढेको देखियो । तर, बालककी आमाले फुटेजमा देखिएका आफ्नै छोरा भए/नभएको यकिन गर्न सकिनन् । प्रहरीले भने उक्त ट्याक्सीबारे अनुसन्धान तीव्र पार्‍यो । इनड्राइभमार्फत ट्याक्सी ‘बुक’ गरिएको अनुसन्धानका क्रममा खुल्यो ।

तर, पाटनबाट गुडेको ट्याक्सी ललितपुरकै झम्सीखेलमा रोकिएको देखियो । त्यहाँबाट पुनः अर्को ट्याक्सी परिवर्तन गरिएको खुल्यो । सुरुमा चढेको ट्याक्सीमार्फत प्राप्त ‘क्लु’ले नै किन्हालुनलाई पक्राउ गर्न प्रहरी सफल भएको हो ।

अनुसन्धानमा संलग्न ती प्रहरीका अनुसार, किन्हालुन झम्सीखेलबाट सुन्धारास्थित गुरु होटेलमा पुगेर बसेको खुलेको थियो । गुरु होटेलबाट पनि उनीहरू शुक्रबार बिहानै बाहिरिइसकेका थिए । सुन्धाराबाट कलंकीको होटेलमा पुगेर बसेको खुलेपछि प्रहरी त्यहाँ पुगेको थियो । कलंकीबाट प्रहरीले किन्हालुन नियन्त्रणमा लिएर बालकलाई बन्धनमुक्त गरेको हो ।

उनी प्रहरीले पक्राउ गरेकै दिन (माघ २५) बिहान साढे १० बजे काठमाडौंबाट वीरगन्ज हुँदै भारत जाने योजनामा थिए । वीरगन्ज जान उनले बसका दुइटा टिकट समेत किनिसकेका खुलेको छ ।

नक्कली भारतीय आधार कार्ड फेला
पक्राउ परेका ती भियतनामी युवक किन्हालुनका साथबाट प्रहरीले नक्कली भारतीय आधार कार्ड फेला पारेको छ । प्रहरीले उनका साथबाट तीन मोबाइल, दुई हजार भियतनामी दोङ (रकम) र एकथान चक्कु समेत बरामद गरेको छ । उनी सन् २०२३ डिसेम्बर २७ मा पहिलोपटक नेपाल आएको अनुसन्धानका क्रममा खुलेको छ ।

पहिलोपल्ट नेपाल आउँदा उनी यहाँ ११ दिन बसेका थिए । त्यति बेला भियतनाम नफर्की उनी भारत गएका थिए । २०२४ अप्रिल २७ मा दोस्रोपटक उनी भारतको पञ्जाबबाट सडकमार्ग हुँदै नेपाल छिरे । त्यसयता उनी काठमाडौंका विभिन्न ठाउँमा बस्दै आएका थिए । योपल्ट बालकलाई समेत पञ्चाब लैजान खोजेको प्रहरीको बुझाइ छ ।

पछिल्लो समय उनी स्वयम्भू, कपन, बौद्धलगायत स्थानका गुम्बाहरूमा पुगेर लामा भाषा समेत पढिरहेका थिए । उनले बालकलाई भारत पुर्‍याएर मानव तस्करहरूलाई बिक्री गर्ने योजनामा बनाएको प्रहरीले जनाएको छ ।