काठमाडौं । स्याङ्जामा नवग्रह मन्दिर निर्माण कार्य अन्तिम चरणमा पुगेको छ । अर्जुनचौपारी गाउँपालिका–१ मा नेपालमै पहिलोपटक नवग्रह मन्दिर निर्माण अन्तिम चरणमा पुगेको पालिकाका अध्यक्ष प्रकाश तिवारीले जानकारी दिए ।

नेपालमा ग्रहकै मात्र पूजा गरिने मन्दिर हालसम्म छैन । विभिन्न शक्तिपीठमा एक छेउमा नवग्रहको प्रतिमा राखेर पूजा गर्ने गरिएको छ । छिमेकी राष्ट्र भारतमा छुट्टै नवग्रह मन्दिर छ । नवग्रह (नौ आकाशीय पिण्ड)को मन्दिर भारतको असमस्थित चित्रसालको पहाडमा मात्र छ । स्याङ्जामा बनाइँदै गरेको नवग्रह मन्दिर असमको भन्दा फरक हुने तिवारीले बताए ।

नवग्रह मन्दिरको मुख्य स्तम्भ नवभुज आकारको हुनेछ । २७ फिट माथितिर फर्केको अग्लो ब्रह्माणीय मूर्तिको दर्शन प्रत्येक वर्षको गणेश चतुदर्शीमा मात्र गर्न पाइनेछ ।

नवग्रह मन्दिरसँगै बनाइएको षट्कोणका बीचमा पशुपतिनाथको जस्तै पञ्चमुखी शिवलिंग र अरू कोणमा गणेश, कुलदेवता, लक्ष्मी, कालभैरव, हनुमान र दुर्गाभवानीको मूर्ति राखिनेछ ।

नवग्रह मन्दिर शनिबार मात्र खुला गरिनेछ । नौमध्ये एक चक्रमा भने अरू दिनमा पनि पूजाआजा गर्न सकिने गरी व्यवस्था मिलाइने उनले जानकारी दिए ।

गण्डकी प्रदेशको राजधानी पोखराबाट करिब ५२ किमिको दूरीमा नवग्रह मन्दिर निर्माणाधीन छ ।