जेरुसेलम/गाजा । सन् २०२३ को अक्टोबर ७ मा दक्षिणी इजरायलमा हमासको नेतृत्वमा भएको आक्रमणमा अपहरित थप तीन इजरायली बन्धकलाई शनिबार रिहा गरिएको छ । बदलामा इजरायलले विभिन्न समयमा पक्राउ गरी आफ्ना जेलमा राख्दै आएका १८३ कैदीलाई रिहा गरेको छ । 

तीन इजरायली बन्धक ५६ वर्षीय ओहाद बेन अमी, ५२ वर्षीय एली शाराबी र ३४ वर्षीय या लेवीलाई रिहा गरिएको हो । शनिबार नै उनीहरूलाई परिवार र आफन्तको जिम्मा लगाइएको छ । 

हमासले रिहा गरिएका बन्धकलाई गाजाको देइर अल–बलाह सहरको तोकिएको हस्तान्तरणस्थलबाट अन्तर्राष्ट्रिय रेडक्रस समिति (आईसीआरसी)को जिम्मा लगाएको थियो ।

कमजोर र थकित देखिएका तीनै बन्धकलाई मञ्चबाट आफ्ना अनुभव र रिहाइबारे बोल्न हमासले निर्देशन दिएको थियो । उनीहरूले संक्षिप्त भनाइ राखेका थिए । त्यसपछि हमासको सैन्य शाखा अल–कासम ब्रिगेडले उनीहरूलाई आईसीआरसीलाई सुम्पेको थियो ।

ती तीन बन्धकलाई मध्य गाजाबाट आईसीआरसीको टोलीले सीमामा तैनाथ इजरायली रक्षा बल (आईडीएफ)सामु पु¥याएको थियो ।

इजिप्ट र कतारको मध्यस्थता र संयुक्त राज्य अमेरिकाको समन्वयमा हमास र इजरायलबीच युद्धविराम सम्झौताको पहिलो चरणअन्तर्गत बन्धक–कैदी अदलाबदलीको यो पाँचौँ समूह हो ।

इजरायलले शनिबार नै जेलबाट थप १८३ प्यालेस्टाइनी कैदीलाई रिहा गरेको छ । गाजा युद्धविराम सम्झौताअन्तर्गत इजरायलले १८३ प्यालेस्टाइनी कैदीलाई रिहा गरेको हो ।

प्यालेस्टाइनी प्रिजनर्स क्लबका प्रमुख अब्दुल्लाह अल–जाघारीका अनुसार, रिहा गरिएका कैदीहरूलाई रेडक्रसको अन्तर्राष्ट्रिय समितिका बसबाट रामल्लाह ल्याइएको छ । रिहा भएका प्यालेस्टाइनीलाई सहरको एउटा चोकमा ठूलो भीडले स्वागत गरेको टीभी फुटेजमा देखाइएको छ । रासस/सिन्ह्वा