सिड्नी । नौ महिनासम्म युक्रेनी सेनाको कब्जामा रहेका दुई युवा नेपाली दूतावास जर्मनी र गैरआवासीय नेपाली संघको पहलमा स्वदेश फर्किएका छन् । 

भारतको नयाँ दिल्लीस्थित एक कन्सल्टेन्सीबाट विद्यार्थी भिसामा युक्रेन पुगेका दोलखा घर भएका शेर साम्बो शेर्पा र तेह्रथुमका फुर्वा शेर्पा नौ महिनाअघि युक्रेनको अध्यागमन टोलीको पक्राउमा परेका थिए । 

छोटो समयको भिसा लिएर युक्रेन पुगेका उनीहरू भिसा थप्ने प्रक्रियामा रहदा युक्रेनी आर्मीको चेकजाँचमा समातिएका थिए । उनीहरूलाई नेपाली दूतावास जर्मनी र गैरआवासीय नेपाली संघको विशेष पहलमा त्यहाँबाट उद्धार गरिएको हो। उनीहरूको हवाई भाडाको व्यवस्था गैरआवासीय नेपाली संघ (एनआरएनए)ले मिलाएको हो ।

एनआरएनका प्रतिनिधिसँग कुरा गर्दै दोलखाका शेर साम्बो शेर्पाले सामाजिक सञ्जालमा देखिएका विज्ञापनमा लागेर भाषा अध्ययन तथा रोजगारीको आसमा आफूहरू माल्दोवा हुँदै युक्रेन पुगेको बताएका छन् । 

शेर्पाले आफूहरू प्रलोभनमा परेर युक्रेन गए पनि अरूलाई नजान समेत आग्रह गरे । अझै पनि दिल्लीको बाटो हुँदै सयौँ नेपाली युक्रेन पुगिरहेको अवस्था छ । दलालहरूले भारतको बाटो हुँदै युक्रेन लाने गरेकाले त्यसलाई रोक्नुपर्ने शेर्पाले बताएका छन् । 

आफूहरूलाई नेपाल फर्काउने क्रममा जर्मनीका लागि नेपाली राजदूत शैल रूपाखेती, एनआरएनए अध्यक्ष बद्री केसी तथा श्रीलंकाली नियोगको महत्त्वपूर्ण भूमिका रहेको उनले बताए । 

अध्यागमनको हिरासतमा रहँदा शारीरिक यातना नदिए पनि मानसिक तनाव भने निकै भएको शेर्पाले बताए । अदालतले डिपोर्ट गर्ने निर्णय गरे पनि युक्रेनी सेनाले स्वास्थ्य परीक्षण गरेर राखेको बताए । कानुनी अड्चनका कारण नौ महिना हिरासतमा बस्नुपरेको शेर्पाले सुनाए ।

एनआरएनका अध्यक्ष बद्री केसीले विदेशी भूमिमा अलपत्र परेका नेपाली नागरिकलाई उद्धार गर्ने आफूहरुको दायित्व भएकाले यसपटक पनि सहयोगी भूूमिकामा सफल भएको बताए । ‘‘हामी निरन्तर सम्पर्क र उद्धारको प्रयासमा थियौँ यसमा राजदूतावासको महत्त्वपूर्ण सहयोग पायौँ र नेपाल ल्याउन सफल भयौँ,’’ केसीले भने । 

एनआरएनले यसअधि पनि विभिन्न मुलुकमा अलपत्र परेका नेपालीलाई सहयोग गर्दै आएको छ ।