काठमाडौं । मोफसलमा बसेर साहित्य सिर्जना गर्दै आएका सर्जक विनयराज गौतमको अर्को कथाकृति ‘रमरतिया’ लोकार्पित भएको छ । शुक्रबार वीरगंजमा आयोजित कार्यक्रममा प्रमुख अतिथि भाषा आयोगका सदस्य गोपाल अश्कलगायतले कृति लोकर्पण गरे । 

कृति सार्वजनिक गर्दै प्रमुख अतिथि साहित्यकार अश्कले कुनै पनि कथाकृति वा उपन्यासमा आञ्चलिकता हुन ठाउँको नाम राखेर मात्रै हुन्न, त्यसको कथावस्तुमै परिवेश झल्किुनु पर्नेमा जोड दिए । उनले कथाकृतिको प्रशंसा गरे ।

समीक्षक रामप्रसाद पाण्डेले कथाले प्रस्तुत गरेको आञ्चलिकता, कृतिको शिल्प शैलीको चर्चा गर्दै स्थानीय समाजको क्रियाकलाप एवम् पीडालाई यसभित्रका कथाहरूले उजागर गरेको बताए । कृतिकार गौतमले कथाकृति आफूले लोकलाई सुम्पिएको बताए ।

पर्सा जिल्ला जेष्ठ नागरिक संघको आयोजनामा सम्पन्न लोकार्पण कार्यक्रममा जगदीशप्रसाद शर्मा, श्यामकुमार पोखरेल, रामप्रसाद साह, वैद्यनाथप्रसाद कोइरी लगायतले बोलेका थिए ।