काठमाडौं । नेपाल महिला ट्वान्टी–२० शृंखलामा घरेलु टिम जितविहीन बनेको छ । शृंखलाको अन्तिम खेलमा शुक्रबार थाइल्यान्डसित सात विकेटको हार व्यहोरेसँगै नेपाल जितविहीन बनेको हो ।

कीर्तिपुरस्थित त्रिवि क्रिकेट मैदानमा शृंखलाको अन्तिम खेलमा नेपालले प्रस्तुत गरेको ८२ रनको लक्ष्य थाइल्यान्डले १७ ओभरमा तीन विकेट गुमाएर पूरा गर्‍यो । थाइल्यान्डको जितमा कप्तान नरुइमोल चाइवाइले सर्वाधिक २७ रन बनाइन् । नानपाट कोन्चारोइन्काईले २३ र नाताया बुचाथमले ११ रन थपे ।

नेपालकी कप्तान इन्दु वर्माले दुई विकेट लिइन् । पूजा महतोले एक विकेट लिइन् ।

त्यसअघि, टस जितेर ब्याटिङमा उत्रिएको नेपालले निर्धारित २० ओभरमा सात विकेट गुमाएर ८१ रन बनाएको थियो । ओपनर सम्झना खड्काले सर्वाधिक १७ रन बनाइन् । कविता जोशीले १४, कप्तान इन्दु वर्माले १० रन थपे । राजमती ऐरी १० रनमा अविजित रहिन् ।

थाइल्यान्डकी ओनिचा काम्चोम्फुले तीन विकेट लिइन् । चनिदा सुथिरुआङ र सुलिपोर्न लाओमीले समान एक विकेट लिए ।

योसँगै थाइल्यान्डले ६ खेलबाट १० अंक जोड्दै प्रतियोगिताको उपाधि जितेको हो । दोस्रो बनेको नेदरल्यान्ड्सले समान खेलबाट आठ अंक जोड्यो । सबै खेल खेले पनि अंकविहीन नेपालले पुछारमा रहँदै प्रतियोगिताको अन्त्य गर्‍यो ।