काठमाडौं । आठौँ नेपाल अन्तर्राष्ट्रिय चलचित्र महोत्सव (निफ)को निर्णायक मण्डलमा नेपालबाट रहने दुई सदस्य छनोट गरिएको छ ।

छोटा चलचित्र तथा वृत्तचित्रतर्फ प्रमुख जुरीमा निर्देशक दीपेन्द्र गौचन र फिचर फिल्मतर्फ अभिनेत्री सुरक्षा पन्त निर्णायक समितिमा सदस्य रहने तय भएको आयोजक संस्था नेपाल चलचित्र तथा सांस्कृतिक प्रतिष्ठानले जनाएको छ । 

महोत्सवमा समसामयिक विषयमा स्वदेशी तथा विदेशी चलचित्रकर्मी, उच्चस्तरका राजनीतिज्ञ र समाजका प्रतिष्ठित व्यक्तित्वहरूबीच छलफल तथा कार्यशालाहरू सञ्चालन हुने निफले जारी गरेको विज्ञप्तिमा उल्लेख छ । 

चैत ७ गते देखि ११ सम्म काठमाडौंमा आयोजना हुने महोत्सवमा ४० देशका ८७ वटा चलचित्र छानिएका छन् । महोत्सवमा देखाइने चलचित्रहरू बुसान, कान, लोकार्नो, बर्लिन आदि प्रतिष्ठित फेस्टिभलमा पनि प्रदर्शन भइसकेका निफका अध्यक्ष केपी पाठकले जानकारी दिए ।