काठमाडौं । राष्ट्रिय सभाका अध्यक्ष नारायण दाहालले डेलिभरी दिन नसक्दा जनतामा संघीयताप्रति नकारात्मकता पैदा हुँदै गएको टिप्पणी गरेका छन् ।
 
सोमबार राष्ट्रिय सरोकार तथा समन्वय समितिले प्रकाशन गरेको ‘सरोकार दर्पण’ पुस्ककको विमोचन गर्दै उनले ऐन-कानुन निर्माणमा आफूहरू नै असन्तुष्ट रहेको सुनाए ।
 
“संघीयता आफैंँमा गलत हो, संघीयताको सिद्धान्त आफैँमा गलत छन् भन्नेतिर म पाउँदिनँ । संघीयता हामीले ल्यायौँ, हामीले नै कार्यान्वयन गर्न जाँदै छौँ,” उनले भने, “कार्यान्वयन हुने हरेक गतिविधि, मुख्यतया ऐन कानुन निर्माणको सवालमा हामी कहीँ न कहीँ आफैँ असन्तुष्ट छौँ भनेपछि जनस्तरबाट थोरै असन्तुष्टि आउने कुरा संघीयता गलत भएर आएको होइन ।”

उनले जिम्मेवारी लिने राजनीतिकर्मीको डेलिभरीका विषयमा आफंँतिर फर्कन सुझाए । “जिम्मा लिएकाले समयमा नै पुर्‍याउन सकेनौँ कि ? हामी त्यतातिर पो फर्कन पर्ने हो कि ? दाहालले भने, ‘‘हामी जिम्मा लिएका राजनीतिकर्मीहरू अनि मात्रै ठिक ठाउँमा पुग्न सक्छौंँ भन्ने लाग्छ ।” 

संघीयता गलत भन्ने कुरा राजनीतिक पूर्वाग्रह भएको उनको भनाइ छ । “संघीयता आफैँमा गलत हो भनेर राजनीतिक आग्रह-पूर्वाग्रहबाट बोल्ने एउटा कुरा, आमजनतामा त्यस्तो होइन । हामीले जनतालाई दिनुपर्ने डेलिभरी दिन सकेका छैनौँ भनिरहका हुन्छौँ,’’ उनी भन्छन् । 

दाहालले राष्ट्रिय सभाका समितिहरू गम्भीर पाएको सुनाए । राष्ट्रिय सभामा पूरा कार्यकाल बिताएका अधिकांश सदस्य सन्तुष्ट भएर फर्कने उनको भनाइ छ ।