काठमाडौं । प्रतिनिधिसभाको पाँचौँ अधिवेशनको सुरूमै रास्वपाले अवरोध गरेको छ ।

राष्ट्रिय स्वतन्त्र पार्टीका सांसदहरुले बैठकमा राष्ट्रपति कार्यालयबाट प्राप्त पत्र पढेर नसुनाउँदै आफूहरु बोल्न पाउनुपर्ने भन्दै उभिएर सभामुख देवराज घिमिरेको ध्यानाकर्षण गराएका थिए । तर सभामुखले रास्वपालाई ढ्यापढ्यापे समय उपलब्ध गराएनन् । 

रास्वपाले ढ्यापढ्यापे समय माग गरेको थियो तर सभामुख देवराज घिमिरेले कार्यव्यवस्था परामर्श समितिको बैठकमा समय माग नगरेको तर बैठक सुरु हुनासाथ अवरोध गरेको भन्दै बस्न आग्रह गरेका थिए ।

सभामुखको आग्रह रास्वपाले नसुनेपछि आदेश गरेका थिए । प्रतिनिधिसभाका नियमावलीको दफा १५ मा यो व्यवस्था गरिएको छ ।

“अघिल्लो बैठक र प्रारम्भ हुन लागेको बैठक बीचको अवधिको कुनै गम्भीर प्रकृतिको घटना वा विषयको सन्दर्भमा सरकारको ध्यानाकर्षण गराउन सदस्यले ढ्याप ढ्याप गरी समय माग गरेमा सभामुखले आकस्मिक समय उपलब्ध गराउन सक्नेछ,” भनिएको छ ।

तर सभामुखले दलीय आधारमा बोल्ने समय तय भएकाले रास्वपाका लागि छुट्टयाइएको समयमा आफ्ना धारणा राख्न अनुरोध गरेका थिए । रास्वपाको अवरोधका बीच सभामुखले कामकारबाही अघि बढाएपछि १५ मिनेटका लागि बैठक बहिस्कार गरेको छ ।