काठमाडाैं । राष्ट्रिय प्रजातन्त्र पार्टीका उपाध्यक्ष रवीन्द्र मिश्रले ईश्वर, देश र जनताको नाममा कसम खाने अधिकांशले फट्याइँ गरेको आरोप लगाएका छन् । 

राप्रपाको ३ दिनको बैठकको अन्त्यमा आफ्नी ८१ वर्षीया आमाको कसम खाँदै उनले तीन प्रतिबद्धता व्यक्त गरेका छन् । ती निर्णय लिँदा, कसले के भन्छ भन्ने कुरासँग आफ्नो चिन्ता नरहने उनले बताएका छन् । 

उनले सामाजिक सञ्जालमा लेखेका छन्, ‘‘म जे निर्णय लिन्छु, त्यो १. देशको दीर्घकालीन हित २. भावी पुस्ताको दीर्घकालीन हित ३. र राप्रपाको दीर्घकालीन हितलाई हेरेर लिनेछु। आफ्नो फाइदा र स्वार्थलाई हेरेर लिने छैन।’

८१ वर्षकी बिरामी आमाको नाममा कसम खानेले आफ्नो फाइदाका लागि फट्याइँ गर्ने छैन भन्नेमा ढुक्क हुन उनले आग्रह गरेका छन् । 

अन्त्यमा उनले लेखेका छन्, ‘‘विचारभन्दा माथि देश, देशका लागि नरेश र त्यसका लागि नवीन समझदारी भनेर त्यसै भनेको होइन।’’

पछिल्लाे समय राप्रपामा शीर्ष नेताबीच नै मतभेद देखिएकाे छ । विशेषगरी अध्यक्ष राजेन्द्र लिङदेन र महामन्त्री धवलशमशेर राणाबीचकाे द्वन्द्व उत्कर्षमा पुगेका बेला मिश्रले यस्ताे धारणा राखेका हुन् ।