काठमाडौं । पत्रकार तथा लेखक गान्धीराज काफ्लेको छैठौँ पुस्तक ‘सुस्वास्थ्य’ एक कार्यक्रमबीच सार्वजनिक भएको छ । 

सोमबार काठमाडौंमा आयोजित कार्यक्रममा प्रमुख अतिथि प्रा.डा. गोविन्दराज भट्टराई, डा. तुलसी भट्टराई, शंकरप्रसाद कोइराला, प्रा.डा. ज्ञानू पाण्डे, प्रा.डा. बालकृष्ण माबुहाङलगायतले पुस्तक सार्वजनिक गरे ।

पुस्तक लोकार्पण गर्दै प्रमुख अतिथि प्रा.डा. भट्टराईले साहित्यमा स्वास्थ्य समेटिनुले साहित्यको आयाम अझै फराकिलो र व्यापक हुँदै गइरहेको बताए । डा. भट्टराईले समाजमा प्रतिष्ठा कमाइसकेका व्यक्तित्वको स्वास्थ्यलाई जोडेर लेखिएको यो कृति हरेक मानिसका लागि प्रेरक भएको उल्लेख गरे ।

कृतिमाथि पाठकीय टिप्पणी राख्दै प्रा.डा. पाण्डेले स्वास्थ्यका सम्बन्धमा हरेक मानिस समयमै जागरुक हुनुपर्छ भन्ने सन्देश यस पुस्तकले दिएको बताइन् । 

अर्का टिप्पणीकार प्रा.डा. माबुहाङले पुस्तकले स्वास्थ्यलाई साहित्यसँग जोड्ने काम गरेको बताए । 

साहित्यकार शंकरप्रसाद कोइरालाले कृतिकारसँग सम्बन्धको चर्चा गर्दै उनको यस पुस्तकले पाठकलाई महत्त्वपूर्ण खुराक दिएको चर्चा गरे ।

कार्यक्रममा डा. तुलसीप्रसाद भट्टराई, प्रा.डा. कुमारप्रसाद कोइराला, लेखक गान्धीराज काफ्ले र हरि गौतमले किताबबारे बोले । 

पुस्तक ओरिएन्टल पब्लिकेशनले बजारमा ल्याएको हो ।