काठमाडौं । ताप्लेजुङको पाथीभरा क्षेत्रमा शनिबार (हिजो) अवस्था तनावपूर्ण बन्यो । केबलकार निर्माणको विरोधमा उत्रिएका प्रदर्शनकारी र प्रहरीबीच झडप भएको हो ।

स्थानीय बलुडाँडामा झडप भएको थियो । झडपका क्रममा केही संख्यामा प्रदर्शनकारी र प्रहरी घाइते भएका छन् । पाथीभरा क्षेत्रमा शनिबार दुईपटक झडप भएको जिल्ला प्रशासन कार्यालय ताप्लेजुङले जनाएको छ ।

“पहिलोपटकको झडप सामान्य नै थियो । दुवैतर्फ (प्रदर्शनकारी र प्रहरी) एक/दुईजना सामान्य घाइते भएको अवस्था थियो,” ताप्लेजुङका सहायक प्रमुख जिल्ला अधिकारी सन्दिपा खड्काले बाह्रखरीसित भनिन्, “स्थिति नियन्त्रणमा नै थियो ।”

उनका अनुसार, पहिलोपटकको झडप दिउँसो करिब साढे ३ बजेतिर भएको थियो । त्यसक्रममा केही सेल अश्रुग्यास प्रहार गरिएको थियो । त्यो करिब मत्थर भइसकेको थियो । त्यसपछि गस्तीमा गएको टोली फर्कने क्रममा थियो ।

त्यति बेलै अर्थात् अपराह्न ३ः५७ बजे प्रदर्शनकारीमध्येका एकजनाले प्रमुख जिल्ला अधिकारी (सीडीओ) नेत्रप्रसाद शर्मालाई फोन गरेर धम्की दिएको सहायक सीडीओ खड्काले बताइन् । “हाम्रो सीडीओ सरलाई फोन गरेर तँ सुरक्षित छैनस् भन्नुभयो, विभिन्न अश्लील गाली गरियो । ज्यान सुरक्षित नभएको भनेर फोन आयो,” उनले भनिन् ।

अर्कोतर्फ, बेलुका करिब ५ः५० बजे गस्तीबाट फर्किरहेको सुरक्षाकर्मीको टोलीमाथि प्रदर्शनकारीले एक्कासि आक्रमण गरेको उनले बताइन् । उक्त टोली प्रहरी निरीक्षक (इन्स्पेक्टर)को कमान्डमा थियो । आक्रोशित प्रदर्शनकारीले इन्स्पेक्टरमाथि आक्रमण गरेपछि स्थिति गम्भीर बनेको उनले जानकारी दिइन् ।

“टोलीको कमान्ड गरिरहनुभएका इन्स्पेक्टरमाथि छुरा र ढुंगा प्रहार गरिएछ । त्यसपछि स्थिति गम्भीर बन्न गयो,” उनले भनिन्, “दोस्रो चरणको झडपमा प्रहरीबाट हवाईफायर भयो ।”

दोस्रोपटकको झडपका क्रममा स्थिति तनावपूर्ण बनेको थियो । हवाईफायरका क्रममा दुई प्रदर्शनकारीलाई गोली लागेको सहायक सीडीओ खड्काले बताइन् ।

उनीहरू दुईसहित प्रदर्शनकारीतर्फ शनिबार बेलुकासम्म चारजना घाइते भएका सूचना प्रशासनसँग थियो । प्रदर्शनकारीतर्फ थप केही व्यक्ति घाइते भएका अपुष्ट जानकारी पनि प्रशासनसँग छ ।

प्रदर्शनकारीतर्फका घाइते चारमध्ये एकजना फुङ्लिङस्थित ताप्लेजुङ जिल्ला अस्पतालबाट ‘डिस्चार्ज’ भइसकेका छन् । गोली लागेका दुईसहित तीनजनालाई उपचारका निम्ति मोरङको विराटनगरस्थित नोबेल मेडिकल कलेजमा पठाइएको उनले जानकारी दिइन् ।

उनका अनुसार, प्रहरीतर्फ २० जना घाइते छन् । जिल्ला अस्पतालमा उनीहरूको उपचार भइरहेको छ । “इन्स्पेक्टर एकजनासहित नेपाल प्रहरी र सशस्त्र प्रहरी दुवै गरी २० प्रहरी घाइते हुनुहुन्छ,” उनले भनिन्, “उहाँहरू सबै जिल्ला अस्पतालमा भर्ना हुनुभएको छ । इन्स्पेक्टर अलि बढी घाइते हुनुहुन्छ ।”

प्रहरीले प्रदर्शनकारीका साथबाट तीनथान खुकुरी र एउटा गुलेली बरामद गरेको उनले जानकारी दिइन् । हालको अवस्था सामान्य रहेको उनले बताइन् ।

केबलकार निर्माणका निम्ति गएको मंगलबारदेखि त्यस स्थानमा जमिन सम्याउने कार्य थालिएको थियो । स्थानीय केही व्यक्तिले उक्त कार्यको विरोध गरिरहेका छन् । झडपपछि त्यो कार्य रोकिएको छ ।

“स्थिति अहिले सामान्य छ । काम के गर्ने भन्ने विषयमा दुवै पक्षबीच छलफल भइरहेको छ,” सहायक सीडीओ खड्काले भनिन्, “थप सुरक्षाकर्मी परिचालन गरी सुरक्षा प्रबन्ध गरिएको छ ।”