काठमाडौं । राष्ट्रपति रामचन्द्र पौडेलसमक्ष आदिवासी जनजाति आयोगले आर्थिक वर्ष २०८०–०८१ को वार्षिक प्रतिवेदन प्रस्तुत गरेको छ ।

राष्ट्रपति भवन शीतलनिवासमा मंगलबार आयोजित कार्यक्रममा राष्ट्रपति पौडेलसमक्ष आयोगका अध्यक्ष रामबहादुर थापा मगरले जनजाति आयोगको वार्षिक प्रतिवेदन पेस गरेका हुन् । 

प्रतिवेदन बुझदै राष्ट्रपति रामचन्द्र पौडेलले आदिवासी जनजाति समुदायको भाषा, लिपि, इतिहास, परम्परा र साहित्यकलाको संरक्षण र प्रवर्द्धन गर्ने सवालमा नेपालको संविधानले आयोगलाई महत्त्वपूर्ण जिम्मेवारी दिएको बताए । 

उनले जिम्मेवारी प्रभावकारी ढंगले सम्पादन गर्ने सन्दर्भमा आयोगलाई थप सफलताको शुभकानमना समेत व्यक्त गरे । 

आदिवासी जनजाति आयोगका अध्यक्ष मगरले प्रतिवेदनको सारसंक्षेप प्रस्तुत गरेको राष्ट्रपति कार्यालयले जनाएको छ ।