काठमाडौं । खोखो विश्वकपको पहिलो संस्करणमै फाइनलसम्मको यात्रा तय गरेको नेपाली राष्ट्रिय महिला टिम उपाधि भिडन्तमा घरेलु टिम भारतसँग पराजित भएको छ ।

आइतबार साँझ भारतको नयाँदिल्लीस्थित इन्दिरा गान्धी इन्डोर रंगशालामा भएको फाइनलमा ७८–४० ले पराजित गर्दै भारतले उपाधि जितेको हो । प्रतियोगितामा अपराजित रहँदै फाइनलसम्म आए पनि नेपालले उपाधि छिनोफानोको खेलमा भने पराजय बेहोरेको हो ।

नेपाली महिला टिम समूह सी को विजेता बन्दै क्वार्टरफाइनलमा आएको हो । नेपाली महिला टिमले समूह चरणमा भुटानविरुद्ध ८३–२४, जर्मनीविरुद्ध ७३–३४, श्रीलंकाविरुद्ध ११०–१० र बंगलादेशविरुद्ध ८३–२४ को जित निकालेको थियो ।

यस्तै, नेपालले क्वार्टरफाइनलमा इरानविरुद्ध १०३–९ र सेमिफाइनलमा युगान्डामाथि ९–१ को सहज जित निकालेको थियो ।