काठमाडौं । प्रधानमन्त्री केपी शर्मा ओलीले स्वास्थ्य बिमा सुधारको कार्ययोजना बनाउन स्वास्थ्य तथा जनसंख्या मन्त्रालयलाई निर्देशन दिएका छन् । स्वास्थ्य बिमा सुधार सुझाव कार्यदलको प्रतिवेदनका आधारमा उक्त कार्ययोजना बनाउन उनले निर्देशन दिएका हुन् ।

प्रधानमन्त्री ओलीले उक्त कार्यदलको प्रतिवेदन र सुझावबारे आइतबार बालुवाटारमा ‘ब्रिफिङ’ लिएका थिए । त्यसपछि उनले निरोगी नेपाल बनाउने लक्ष्यसहित नागरिकलाई सुरक्षित गराउनुपर्ने र बिरामी भइहालेमा खर्च नभएर उपचार गर्न नपाउने अवस्था आउन दिन नहुने बताए ।

उनले स्वास्थ्य बिमा कार्यक्रमलाई सुधार गर्ने गरी एक साताभित्र कार्ययोजना ल्याउन मन्त्रालयलाई निर्देशन दिएका प्रधानमन्त्रीको सचिवालयले जनाएको छ ।

• स्वास्थ्य बिमा सुविधाको दायरा पाँच लाख पुर्‍याउन प्रक्रिया अघि बढेकोे हो ?

स्वास्थ्य तथा जनसंख्यामन्त्री प्रदीप पौडेल, कार्यदलका संयोजक डा. शम्भु आचार्य, सदस्यहरू डा. भगवान् कोइराला, डा. रघुराम काफ्ले र सदस्यसचिव डा. सरोज शर्माले प्रधानमन्त्री ओलीलाई स्वास्थ्य बिमा कार्यक्रमको नीतिगत, कानुनी र संरचनागत परिवर्तन गर्नुपर्ने देखिएको ब्रिफिङ गरेका थिए ।

हाल यो कार्यक्रमअन्तर्गत करिब ११ अर्ब रुपैयाँ भुुक्तानी गर्न बाँकी छ । यो कार्यक्रममा कुल जनसंख्याको २७ प्रतिशत नागरिक आबद्ध भइसकेका छन् । आबद्ध भएका मध्ये ४८ प्रतिशतले सेवा लिएका छन् ।

सबै नागरिकलाई कार्यक्रममा अनिवार्य सहभागी गराउने र निरपेक्ष गरिबीको रेखामुनि रहेका सबैको स्वास्थ्य सेवा निःशुल्क गर्नुपर्ने ढाँचामा जान कार्यदलले सुझाव दिएको छ । कार्यदलले आधारभूत स्वास्थ्य सेवा र अरू सामाजिक सुरक्षाका कोषसँग यो कार्यक्रमलाई एकीकरण गर्न सुझाएको छ ।

कार्यदलले गएको पुस १४ गते मन्त्रालयलाई प्रतिवेदन बुझाएको थियो ।