काठमाडौं । हिमपातसँगै बाक्लो हुस्सुका कारण भारतका उत्तरी राज्यहरूको जनजीवन प्रभावित भएको छ । शुक्रबार बिहान १८ राज्यमा हुस्सुका कारण भिजिबिलिटीमा गिरावट आएको छ ।

दिल्लीमा ११७ भन्दा बढी उडानमा ढिलाइ भएको छ । यस्तै, १० उडान रद्द भएका छन् । दिल्ली आउने २७ रेलहरू पनि निर्धारित समयमा पुग्न सकेनन् ।

हिमपातका कारण हिमाचल प्रदेशका हिमाली क्षेत्र सेताम्य भएका छन् । तीन राष्ट्रिय राजमार्गसहित २०० सडक बन्द छन् ।

सिम्लामा मात्र ५६ सडक बन्द भएका छन् । यस्तै, १५ एचआरटीसी बस हिमपातमा फसेका छन् ।

मौसम विभागले आज पनि सिम्लामा हिमपात हुने बताएको छ ।

उता मध्य प्रदेश र राजस्थानमा पनि तापक्रम निरन्तर घटिरहेको छ । दुवै राज्यका २० सहरमा तापक्रम १० डिग्री सेल्सियसभन्दा कम रहेको छ । हिमाचल प्रदेश र जम्मू कश्मीरको तापक्रममा थप गिरावट आउने पूर्वानुमान गरिएको छ ।