काठमाडौं । भारतीय नागरिकको बैंक खाता दुरुपयोग भएपछि चिनियाँ व्यक्ति अपहरणमा परेको खुलेको छ । चिनियाँलाई अपहरण गर्ने चार भारतीयलाई उपत्यका अपराध अनुसन्धान कार्यालयको टोलीले मंगलबार (हिजो) साँझ मकवानपुरको भीमफेदीबाट पक्राउ गरेको छ ।

पक्राउ पर्नेमा भारतको महाराष्ट्रका ३३ वर्षीय आशुतोष दत्तात्रय थोरत, सोही ठाउँका अमोल खर्माते, युनुस सेख र अम्बादास सिरसत छन् । चिनियाँ नागरिकले बैंक खाता दुरुपयोग गरेकाले अपहरण गरेको उनीहरूले प्रहरीसमक्ष बयान दिएका छन् । उनीहरूमाथि प्रहरीले अपहरण तथा शरीर बन्धक कसुरमा अनुसन्धान थालेको छ ।

गएको पुुस २९ गते भारतबाट काठमाडौं आएका उनीहरूले मंगलबार साँझ ठमेलबाट चिनियाँ नागरिक यो हुन चुनलाई अपहरण गरेका थिए । उनी ठमेलको एक चिनियाँ रेस्टुरेन्टको म्यानेजर हुन् ।

भारतीय समूहले नै नेपाल ल्याएको महाराष्ट्रको १६ डीसी ४९०४ नम्बरको सेतो कारमा जबरजस्ती राखेर ती चिनियाँ नागरिकलाई भारततर्फ लैजान खोजिएको थियो । ठमेलबाट गाडीमा राखेर उनलाई मकवानपुर हुँदै भारत पुर्‍याउन खोज्दा प्रहरीले नियन्त्रणमा लिएको हो ।

भारतीयले चिनियाँ नागरिकले अनलाइनबाट आफ्नो बैंक एकाउन्ट दुरुपयोग गरी रकम ठगी गरेको भन्दै त्यो फिर्ता मागेका प्रहरीको अनुसन्धानका क्रममा खुलेको छ ।

प्रहरीका अनुसार, विभिन्न भारतीयलाई ‘स्क्याम’मा पारेर ती चिनियाँ नागरिकले पक्राउ परेकाहरूको बैंक खातामा रकम ट्रान्सफर गर्न लगाउने धन्दा चलाएका थिए । तर, भारतीय नागरिक नै ठगीएको उजुरी महाराष्ट्र प्रहरीमा परेपछि चिनियाँ नागरिकको खोजीमा उनीहरू नेपाल आएका थिए ।

थाइल्यान्ड र नेपालमा बसेका चिनियाँ नागरिकले सुरुमा उनीहरूलाई प्रभावमा पारेर बैंकको रकम ‘ट्रान्जेक्सन’ गर्न मात्र खाता मागेका थिए । केही रकम कमिसन पाउने लोभमा उनीहरूले चिनियाँ नागरिकलाई आफ्नो बैंक एकाउन्ट दिएका थिए । अनलाइन ठगी गरेको रकम चिनियाँ नागरिकले पनि उनीहरूको खातामा पठाउन थाले । त्यसपछि उनीहरूविरुद्ध नै महाराष्ट्र प्रहरीमा उजुरी परेको थियो ।

चिनियाँ नागरिकले भने ठमेलमा बसेर आफूले रेस्टुरेन्ट मात्र सञ्चालन गरेको, अनलाइन ठगीमा कुनै संलग्नता नरहेको जिकिर गरेका छन् । भारतीय नागरिकले झुक्किएर आफूलाई अपहरण गरेको उनले प्रहरीसामु बताएका छन् ।

अनलाइन ठगीका मुख्य योजनाकार चिनियाँ नागरिक भने थाइल्यान्डमा रहेको खुलेको छ । थाइल्यान्डमा रहेका चिनियाँले नै पक्राउ परेका भारतीयलाई काठमाडौंमा आफ्नो मान्छे रहेको भनेर भेट्न पठाएको खुलेको छ ।

भारतीय नागरिक पक्राउ परेपछि चिनियाँ भीमफेदीको जंगलतर्फ भागेका थिए । बुधबार उनी प्रहरी सम्पर्कमा आएका छन् । उनीसहित दुई चिनियाँ नागरिकमाथि समेत अनुसन्धान थालिएको प्रहरीले जनाएको छ ।