काठमाडौं । देशभर आज मुख्यतया मौसम सफा रहनेछ । 

जल तथा मौसम विज्ञान विभागका अनुसार तराईका धेरै स्थानमा हुस्सु र कुहिरो लागेको छ । 

बिहान तराई तथा उपत्यकाका केही स्थानमा हुस्सु र कुहिरो लागेकाले दैनिक जनजीवन, स्वास्थ्य, सडक तथा हवाई यातायात सेवामा क्षणिक/आंशिक असर पर्नसक्ने जल तथा मौसम विज्ञान विभागले जनाएको छ । त्यसैले आवश्यक सतर्कता अपनाउन विभागको आग्रह छ । 

तराईका धैरै स्थानमा एक हजार मिटरभन्दा कम भिजिविलिटी रहेको छ । 

“विराटनगर, धनगढी, जनकपुर, वीरगन्जलगायत स्थानमा एक हजारभन्दा कम भिजिविलिटी छ,” मौसमविद् सरोज पुडासैनी बाह्रखरीसँग भन्छन्, “भिजिविलिटी न्यून भएकाले हवाई सेवा प्रभावित हुने सम्भावना छ । तराईका अधिकांश स्थानमा फग छ । यसले यातायात सेवामा असर पर्छ ।” 

काठमाडौंमा बिहान ६ बजेको भिजिविलिटी ६ हजार मिटर छ । यसले भने विमान उडान र अवतरणमा खासै असर गर्दैन । 

घाम लाग्दै गएपछि मध्याह्नसम्म तराई र उपत्यकामा रहेको हुस्सु र कुहिरो हट्दै जानेछ । 

एक हजारभन्दा कम भिजिविलिटी भए कुहिरो र एक हजारदेखि माथि पाँच हजारसम्म फग भए त्यसलाई हुस्सु भन्ने गरिएको मौसमविद् पुडासैनीको भनाइ छ । त्यसैले हुस्सुभन्दा कुहिरोले यातायात सेवामा असर पुर्याउँछ । 

काठमाडौंमा आज बिहान पौने ६ बजेको न्यूनतम तापक्रम ६.३ डिग्री सेल्सियस मापन गरिएको छ । दिउँसो बढेर १७ देखि १९ डिग्री सेल्सियससम्म पुग्ने पूर्वानुमान छ । 

यसैबीच, आज बिहान पहाडी भू–भागमा आंशिक बदली रहेको छ । बाँकी भू–भागमा मौसम मूख्यतया सफा छ । 

दिउँसो र राति कोसी प्रदेशमा आंशिक बदली हुनेछ । बाँकी प्रदेशका मौसम सफा रहने मौसमविद् पुडासैनीले जानकारी दिए । 

“आजबाट मौसम सफा हुनेछ । हिजोसम्म वर्षा र हिमपात भए पनि आजबाट देशभरको मौसम खुलेको हो,” उनले भने । 

मंगलबार काठमाडौंमा वर्षाको पूर्वानुमान गरिएको थियो । पूर्वानुमानअनुसार काठमाडौंका दुई ठाउँमा वर्षामापन स्टेसनमा वर्षामापन भएको छ । 

मौसमविद् पुडासैनीका अनुसार धापड्याममा ५ मिलिमिटर र बूढानीलकण्ठमा २.५ मिलिमिटर वर्षामापन भएको छ ।

हाल देशमा पश्चिमी वायुको सामान्य प्रभाव रहेको छ ।