काठमाडौं । सरकारले स्टार्टअप उद्यम कर्जा सञ्चालन कार्यविधि, २०८१ अनुसार ऋण उपलब्ध गराउन एक हजार ३१४ कम्पनीको प्रारम्भिक सूची सार्वजनिक गरेको छ । उद्योग, वाणिज्य तथा आपूर्ति मन्त्रालयअन्तर्गतको औद्योगिक व्यवसाय विकास प्रतिष्ठानले उक्त सूची सार्वजनिक गरेको हो ।

यसका निम्ति सरकारले तीन प्रतिशत ब्याजदरमा २५ लाख रुपैयाँसम्म ऋण दिनेछ । यो ऋणका निम्ति अनलाइन र भौतिक रूपमा गरी पाँच हजार १५८ कम्पनीले प्रस्ताव आवेदन पेस गरेका थिए । तीमध्ये एक हजार ३१४ कम्पनी छनोटमा परेका हुन् ।

अनलाइनबाट तीन हजार ३२० आवेदन परेका मध्ये ६५५ कम्पनी प्रारम्भिक सूचीमा परेका छन् । भौतिक रूपमा आवेदन दिएका एक हजार ८३८ मध्ये ६५९ कम्पनी प्रारम्भिक सूचीमा परेका हुन् ।

प्रारम्भिक छनोट सूचीमा परेका कम्पनीलाई यही पुस २८ गतेदेखि प्रस्तुतीकरणका निम्ति बोलाइने प्रतिष्ठानका सूचना अधिकारी विश्वनाथ घिमिरेले जानकारी दिए ।

प्रस्तुतीकरणपछि थप बैंकिङ प्रक्रिया र अनुगमनबाट योग्य ठहरिने कम्पनी तथा फर्मले सहुलियतपूर्ण कर्जा प्राप्त गर्नेछन् ।

तीन प्रतिशत ब्याजदरमा बढीमा २५ लाख रुपैयाँसम्म पाइने कर्जा पाँच वर्षभित्र पूर्ण रूपमा भुक्तानी गरिसक्नुपर्ने प्रतिष्ठानले जनाएको छ ।

प्रारम्भिक छनोटमा परेका कम्पनीको सूची हेर्नोस्–