काठमाडौं । नेकपा (माओवादी केन्द्र)का स्थायी कमिटी सदस्यहरूले नयाँ संगठनात्मक सिद्धान्तको विकास गर्न पार्टी नेतृत्वलाई सुझाव दिएका छन् । आइतबार बिहान पार्टी केन्द्रीय कार्यालय पेरिसडाँडामा बसेको स्थायी कमिटीको बैठकमा सदस्यहरूले यस्तो सुझाव दिएका हुन् ।

बैठकमा अधिकांश सदस्यले नयाँ संगठनात्मक सिद्धान्तको विकास गर्न जरुरी रहेकामा जोड दिएका थिए । पार्टीका प्रवक्ता अग्निप्रसाद सापकोटाले युवालाई प्रशिक्षित र संगठित गर्ने विषयमा पनि सुझाव प्राप्त भएको बताए ।

“...संगठनात्मक सिद्धान्तको बारेमा पनि छलफल भएको छ । आधारभूत रूपमा त हामीले माओवादी संगठनात्मक सिद्धान्तलाई नै आधार बनाउँछौँ, तर अहिले पनि पहिला विकास गरेको कुरामा आमूल परिवर्तन भएको छ,” उनले भने, “विज्ञान, प्रविधिलगायतका क्षेत्रमा, अन्य क्षेत्रमा पनि प्रविधिको विकास भइरहेको छ । युवाहरूलाई प्रशिक्षित गर्ने, संगठित गर्ने यी विषयदेखिलगायत विज्ञान र प्रविधिको सबै कुरा विचार गर्दै नयाँ संगठनात्मक सिद्धान्तको विकास गर्नुपर्छ भनेर सुझाव दिनुभएको छ ।”

माओवादी केन्द्रीय कमिटीको बैठक पनि आजै बस्दै छ । “केन्द्रीय समितिको बैठकमा अध्यक्षले अहिलेको समसामयिक, राजनीतिक परिस्थितिबारे ब्रिफिङ गर्नुहुनेछ,” उनले भने, “त्यसपछि प्रदेशका अध्यक्षहरूले सबै प्रदेशबाट रिपोर्टिङ गर्नुहुनेछ । त्यसपछि अध्यक्षले राजनीतिक प्रस्ताव पेस गर्नुहुनेछ ।” न्युज एजेन्सी नेपाल