काठमाडौं । स्पेनिस घरेलु फुटबलको चौथो डिभिजनको क्लब बार्बास्ट्रोविरुद्ध ४–० को सहज जित निकाल्दै ला लिगा ‘जायन्ट’ बार्सिलोना कोपा डेल रेको अन्तिम–१६ मा प्रवेश गरेको छ ।

शनिबार राति बार्बास्ट्रोको मैदानमा बार्सिलोनालाई जित दिलाउन रोवर्ट लेवान्डोवस्कीले दुई गोल गरे । एरिक गार्सिया र पाब्लो टोरेले समान एक गोल थपे । बार्सिलोनाले पहिलो र दोस्रो हाफमा समान दुई गोल गरेको हो ।

खेलको २१औँ मिनेटमा गार्सियाको गोलमा बार्सिलोनाले अग्रता बनाएको थियो । त्यसको १० मिनेटपछि लेवान्डोवस्कीले गोल गर्दा बार्सिलोनाले पहिलो हाफमा २–० को अग्रता बनायो । ४७औँ मिनेटमा लेवान्डोवस्कीले नै गोल गरेपछि बार्सिलोनाले अग्रतालाई ३–० मा पुर्‍याएको थियो । ५६औँ मिनेटमा टोरेले गोल गरेसँगै बार्सिलोनाले ४–० को जित निश्चित गरेको हो ।

जितसँगै बार्सिलोनाले अन्तिम–१६ मा स्थान बनाए पनि क्वार्टरफाइनल पुग्न प्रतिद्वन्द्वी पाइसकेको छैन ।

ला लिगामा भने बार्सिलोना तालिकाको तेस्रो स्थानमा छ । क्याटालनको यो टिमले १९ खेल खेल्दा ३८ अंक जोडेको छ ।