काठमाडौं । पूर्वप्रधानमन्त्री एवं नेकपा (एकीकृत समाजवादी)का सम्मानित नेता झलनाथ खनालले बेल्ट एन्ड रोड एनिसिएटिभ (बीआरआई) परियोजनाअन्तर्गत ऋण लिनै हुँदैन भन्नु थोत्रो अवधारणा भएको टिप्पणी गरेका छन् ।

बुधबार काठमाडौंमा आयोजित एक कार्यक्रममा बोल्दै उनले यस्तो बताएका हुन् । उनले अहिले प्रधानमन्त्री केपी शर्मा ओलीले बीआरआई फ्रेमवर्क एग्रिमेन्ट गरेको भन्दै अब परियोजनाअन्तर्गत नयाँ योजनाहरू ल्याउन सकिने सम्भावना रहेको उल्लेख गरे । अझै गहन छलफल गरेर बौद्धिक व्यक्तिका सुझाव लिएर देशको हितमा योजनाका प्रस्तावहरू चीनसँग लैजानुपर्ने बताए ।

उनले ऋण लिनै हुँदैन, अनुदान मात्रै लिनुपर्छ भन्नु थोत्रो र चिन्तन गर्न नसक्ने, भिजन क्रिएट गर्न नसक्ने अवधारणा रहेको उल्लेख गरे । यस्तो अवधारणा ल्याउनु देशको राष्ट्रिय आवश्यकतालाई बुझ्न नसक्ने मानिसहरूको कुरा मात्रै भएको उनको भनाइ छ । देशको आवश्यकताअनुसार आफ्ना परियोजनाहरू बनाएर अघि बढ्नुपर्नेमा जोड दिए ।

"बीआरआईअन्तर्गत ऋण लिनै हुँदैन, ग्रान्ड मात्रै लिनुपर्छ भन्नेखालका जुन अवधारणा हुन्, यी अवधारणा भनेका आफैँमा थोत्रा अवधारणा हुन् । यो चिन्तन गर्न नसक्ने, भिजन क्रिएट गर्न नसक्ने, विषयवस्तुलाई बेनिफिट गरेर बुझ्न नसक्ने र आफ्नै देशको राष्ट्रिय आवश्यकतालाई बुझ्न नसक्ने मानिसहरूका कुरा मात्रै हुन् । हामीले देशको आवश्यकता के हो ? त्यसअनुसार आफ्ना परियोजनाहरू बनाएर अघि बढ्न सक्नुपर्छ । त्यसो गर्नसके मात्रै बीआरआईबाट हुनसक्ने फाइदाहरू लिनसक्छौँ," उनले भने ।

सम्मानित नेता खनालले नेपालमा बीआईआई परियोजनाका बारेमा भ्रमहरू फैल्याइएको बताए ।