काठमाडौं । पछिल्लो समय सर्बियामा अनौठो खालको विरोध प्रदर्शन भइरहेको छ । सर्बियामा हरेक दिन दिउँसो ११ बजेर ५२ मिनेटमा १५ मिनेटका लागि सडक बन्द गरेर विरोध प्रदर्शन हुन थालेको छ ।

गत नोभेम्बरमा सर्बियाको दोस्रो ठूलो सहर नोभी सादमा रेलवे स्टेसनको छत खसेको थियो । यस दुर्घटनामा १५ जनाको मृत्यु भयो ।

सर्बियामा भइरहेको १५ मिनेटको विरोध रेलवे स्टेसनको छत खसेकै समयमा सुरु हुन्छ । दुर्घटनापछि यस प्रकरणमा १२ जना पक्राउ परेका छन् । रेलवे स्टेसनको छत खसेको विषयमा त्यहाँका निर्माणमन्त्रीले राजीनामा दिइसकेका छन् । राजीनामा दिएपछि उनी पक्राउ पनि परेका छन् ।

यस घटनापछि सर्बियावासीहरू आक्रोशित भएका छन् । सुरुवातमा यो विरोध प्रदर्शन बेलग्रेड विश्वविद्यावलयका विद्यार्थीले आफ्नो विश्वविद्यालयको परिसरमा सुरु गरेका थिए । तर, विस्तारै देशभर फैलियो । अहिले सर्बियाका ५० भन्दा बढी विश्वविद्यालय र विद्यालयमा यस्तो विरोध प्रदर्शन हुन थालेको छ ।

आइतबार यही विषयमा सर्बियामा ठूलो विरोध प्रदर्शन भयो । हजारौँको संख्यामा उपस्थित प्रदर्शनकारीले मोबाइलको फ्लयास लाएट बालेर प्रदर्शन गरे ।

विद्यार्थीहरूले सरकारको गैरजिम्मेवारीका कारण दुर्घटना भएको बताइरहेका छन् । विद्यार्थीहरूले थालेको विरोध प्रदर्शनमा अहिले किसान, स्वास्थ्यकर्मी र कलाकार पनि जोडिन थालेका छन् ।

प्रदर्शनकारीले रेलवे स्टेसनको छत निर्माणमा लापरबाही गरिएको, भ्रष्ट्राचार गरिएकोसहितका आरोप लगाइरहेका छन् । प्रदर्शनकारीले दुर्घटनासँग सम्बन्धित सबै कागजात सार्वजनिक गर्न पनि माग गरेका छन् ।

बीबीसी हिन्दीबाट ।