काठमाडौं । संस्कृति पर्यटन तथा नागरिक उड्डयनमन्त्री बद्री पाण्डेले सुदूरपश्चिम प्रदेश विविधतापूर्ण संस्कृतिमा धनी प्रदेश भएको बताएका छन् । सुदूरपश्चिम कलाकार समाजले सोमबार काठमाडौंमा आयोजना गरेको पुस १५ विविध सांस्कृतिक कार्यक्रमलाई सम्बोधन गर्दै मन्त्री पाण्डेले उक्त कुरा बताएका हुन् । 

पुस १५ लाई सुदूरपश्चिमले ठूलो पर्वका रूपमा मनाउने गरेको स्मरण गर्दै उनले यस पर्वलाई रात छोटो र दिन लामो हुनुका साथै चिसो मौसम अन्त्य भएर न्यायो मौसमको सुरुवातको रूपमा मनाउने गरेको बताए । 

मन्त्री पाण्डेले पछिल्लो पुस्ता मिहिनेतका कारण दूरदराजका कला संस्कृतिको उजागर र संरक्षणमा टेवा पुगेको बताए । उनले सुदूरपश्चिमेली कलाकारले गुणस्तरीय गीतमार्फत आफ्नो क्षेत्रका विविध पक्षको उजार गर्ने गरेको समेत बताए । 

उक्त  समारोहमा देउडा सम्राट एवं नेपाली राष्ट्रिय गान छनोट समितिका सदस्य नन्दकृष्ण जोशीलगायत दर्जनौँ कलाकारले आफ्नो प्रस्तुति, छलिया नाच, देउडा नाच समेत प्रस्तुत गरेका थिए ।