काठमाडौं । पुस ६ गते (शनिबार) बाराको जितपुर सिमरा उपमहानगरपालिका–११ स्थित बकुलिया रमौली सडकखण्डकै छेउमा बिहानै कार पार्किङ गरिएको अवस्थामा फेला पर्‍यो । स्थानीयवासीलाई लागेको थियो– कार चालकले नै कार छोडेर कतै गएका होलान् ।

बिहानैदेखि सडक छेउमा राखिएको कार राति ९:१५ मिटन जाँदा समेत त्यही रर्‍यो । कार सडक छेउमै लामो समय पार्किङमा राखिएको देखेपछि स्थानीयलाई शंका लाग्यो– कार कसले किन छाड्यो होला ?

खैरो रंगको कार वाग्मती प्रदेश–०१–०२८ च ७६१६ नम्बरको ईभी थियो । स्थानीय कार रहेकै ठाउँमा पुगे । जब कारभित्रको दृश्य देखे, उनीहरू तर्सिए । सिटमै चालक बेहोस थिए । स्थानीयले तत्काल प्रहरीलाई खबर गरे ।

स्थानीयको सूचना पाएपछि जिल्ला प्रहरी कार्यालय बारा र इलाका प्रहरी कार्यालय सिमराको टोली एकसाथ कार पार्किङ गरिएको स्थान पुगे । सिट खोलेर हेर्दा चालक मृत अवस्थामा भेटिए ।

मृतकको साथबाट फेला परेका कागजातका आधारमा मृतक प्रहरीकै कार्यालय सहयोगी भएको खुल्यो । मृतक जितपुर सिमरा–१ घर भई इलाका प्रहरी कार्यालय सिमरा दरबन्दी रहेको तर सिमरा विमानस्थल सुरक्षा गार्डमा कार्यरत राजकुमार रुम्बा रहेको खुल्यो । रुम्बामा बाहिरी चोट केही देखिएको थिएन ।

प्रहरीलाई लागेको थियो– सिटमै बसेको अवस्थामा मृत फेला परेका कारण केही स्वास्थ्य समस्याले उनको ज्यान गयो होला । प्रहरीले शव पोस्टमार्टमका लागि अस्पताल पठाए । तर, पोस्टमार्टको रिपोर्टले प्रहरी नै झस्कियो ।

पोस्टमार्टमा रिपोर्टमा भनिएको थियो– ‘गनसर्ट इन्जोरी टू हेड ।’

अस्पतालबाट रुम्बाको टाउकोमा एक थान गोली नै फेला परेको थियो । पोस्टमार्टम रिपोर्टले झस्किएको बारा प्रहरीले सुक्ष्म अनुसन्धान थाल्यो । रुम्बाको शव फेला परेको एक हप्तापछि बारा प्रहरीले तीन जनालाई पक्राउ गर्न सफल भएको छ ।

पक्राउ पर्नेमा बाराजितपुर–१९ का मोटरसाइकल वर्कसपमा कार्यरत २७ वर्षीय पुरुषोतम कुमार दास, सोहीका इन्द्रजित कुमार चौहान र महोत्तरी जलेश्वर–३ का श्रीकान्त तिवारी छन् । पक्राउ परेकामध्ये तिवारी राष्ट्रिय अनुसन्धान विभागका अनुसन्धान अधिकृत (इन्स्पेक्टर) समेत हुन् ।

उनीहरूमाथि प्रहरीले थप अनुसन्धान सुरु गरेको छ । प्रहरीले उनीहरूको साथबाट मृतकले प्रयोग गरेको सुनको सिक्री, पर्स, झोला र पक्राउ परेकाहरूले प्रयोग गर्दै आएका ६ थान मोबाइल, ना१३प५४७ नम्बरको मोटरसाइकल बरामद गरेको छ ।

रुम्बाकै कारमा चढेका थिए आरोपित !

प्रहरीको अनुसन्धानका क्रममा रुम्बामाथि गोली प्रहार गर्ने आरोपित २७ वर्षीय पुरुषोतम कुमार दास हुन् । दाससमेत रुम्बाकै कारमा सवार थिए ।

बारा प्रहरी प्रमुख एसपी महेन्द्र खड्काका अनुसार, कार रुम्बालाई कलैया जानका लागि भनेर पक्राउ परेका अर्का आरोपित इन्द्रजित चौहानले बुक गर्न लगाएका थिए ।

एसपी खड्काले भने, ‘‘रुम्बाको हत्या पूर्वयोजनाअनुसार गरिएको देखिन्छ । पक्राउ परेका आरोपित चौहानले नै बाराको कलैया जाने भनेर रुम्बालाई कार बुक गर्न लगाएको खुलेको छ । कार चढेपछि भने चौहानले नै दासलाई समेत राखेको देखिन्छ । बाटोमा भने पिसाब फेर्न भनेर निस्केपछि पछाडीबाट गोली हानेर भागेको देखिन्छ ।’’

उनीहरूले त्यसका लागि एक महिनादेखिनै योजना बनाएको देखिएको खड्काले बताए । उसो त मृतक रुम्बा र दासबीच केही समयअघि झगडासमेत भएको खुलेको छ । प्रहरी स्रोतका अनुसार, दासले नै मन पराएको युवतीलाई रुम्बाले समेत जिस्काउन खोजेपछि उनीहरूबीच झगडा भएको थियो । सोही विषयको रिसइबी हत्याको कारणसम्म पुगेको हुन सक्ने प्रहरीले जनाएको छ । त्योबाहेक लुटपाट गर्ने उद्देश्यले समेत हत्या गरिएको प्रहरीले जनाएको छ ।

हत्याको योजनाकार भने दास र चौहान हुन् । तर, कार राष्ट्रिय अनुसन्धान विभागका अनुसन्धान अधिकृत (इन्स्पेक्टर) तिवारीको भएको खुलेपछि उनीसमेत पक्राउ परेका हुन् ।

पीडित परिवारको जाहेरिको आधारमा तिवारीमाथि अनुसन्धान गर्न पक्राउ गरिएको एसपी खड्काले बताए । यद्यपि, प्रहरीसँगको बयानका क्रममा तिवारीले आफ्नोकार भाडामा रुम्बालाई दिएको र घटनाबारे आफूलाई भने जानकारी नभएको बताएका छन् । हत्या हुँदासमेत कारमा तिवारी सवार नरहेको प्रहरीको अनुसन्धानका क्रममा खुलेको छ ।